لو حد في العيلة عنده السكر اعرف الـ8 علامات اللي لو عندك لازم تكشف 

مرض السكر من أكثر الأمراض انتشاراً في العالم، سببه ارتفاع مستوى السكر في الدم إما نتيجة قلة إفراز هرمون الأنسولين بشكل كافي لحاجة الجسم، أو بسبب ضرر في خلايا البنكرياس اللي بتفرز الأنسولين، وفي الحالتين بيحصل زيادة نسبة السكر في الدم وتراكمه خارج خلايا الجسم اللي مبتقدرش تستفيد بيه فبيسبب ضرر لأجهزة وأعضاء مختلفة من الجسم.

فيه 8 أعراض مرتبطين بمرض السكر واللي وجودهم علامة انك لازم تروح تكشف وتعمل تحليل لنسبة السكر، الأعراض دي:

1. التبول المتكرر والعطش الشديد:
   التبول الزيادة عن الطبيعي في اليوم لدرجة ان الشخص ممكن يقوم بليل أكتر من مرة ممكن يكون دليل على السكر وده لأن الكلية بتحاول تتخلص من كمية السكر الزيادة في الدم عشان متأثرش بشكل ضار على الجسم عن طريق إخراجها مع البول، ونتيجة لإخراج كمية كبيرة من المياه من الجسم فالمريض بيحس بعطش شديد لتعويض الفاقد من المياه.
2.  فقدان في الوزن بشكل كبير وغير متعمد والاحساس المستمر بالجوع:
   مريض السكر بيحس ان وزنه بيقل بدون ممارسة رياضة أو اتباع نظام غذائي للتخسيس. وفقدان الوزن بيبقى نتيجة لفقدان سعرات حرارية نتيجة للتبول المتكرر وفقدان مياه من الجسم. وتراكم السكر في الدم وعدم وصوله للخلايا بيسبب إحساس المريض الدائم بالجوع.
3. إجهاد دائم:
   الإرهاق مع وجود أعراض تانية من المذكورة ممكن يكون نتيجة لمرض السكر، نتيجة لان الجسم مش بيلاقى الطاقة الكافية وده  بسبب عدم قدرة السكر على الدخول للخلايا.
4. رؤية مشوشة وزغللة في العين فجأة:
   نتيجة لجفاف العين اللي بيحصل بسبب امتصاص الجسم للمياه من الأنسجة المحيطة بالأوعية الدموية ومن ضمنها العين لتعويض زيادة كثافة الدم بسبب زيادة نسبة السكر فيه. ده بيأدي لنقص المياه في عدسة العين فبيسبب زغللة.
5. بطء التئام الجروح:
   مرض السكر بيسبب ضيق الأوعية الدموية الصغيرة في الأطراف وده بيقلل الإمداد الدموي وإمداد الأكسجين والغذاء في المناطق دي وبالتالي بيقلل من سرعة وكفاءة التئام الجروح.
6. كثرة الإصابة بالعدوى:
   زيادة نسبة السكر في الدم بتقلل قدرة الجسم على مقاومة العدوى، ومن المناطق اللي بتكتر فيها العدوى في حالة مريض السكر هي اللثة والجلد والمثانة والكليتين. أثبتت الدراسات ان مريض السكر بيكون أكثر عرضة للعدوي بسبب ضعف الجهاز المناعي اللي بيكون بسبب زيادة مستوى السكر، انخفاض نشاط البول في مقاومة البكتيريا، انخفاض وظائف الجهاز الهضمي والبولي، وتكرار التدخل العلاجي لعلاج المشاكل الصحية الناتجة عن السكر وده بيأدي لانخفاض المستوى المناعي للجسم.
7. إحساس بحرقان وخدلان في الإيدين والرجلين:
   زيادة نسبة السكر في الدم بيزود من كثافته فبيعمل ضغط على الأعصاب وبالتالي يسببب ضعف الأعصاب وتلفها.
8. مشاكل وتصبغات في الجلد ودمامل.

وزى ما قلنا مرض السكر بتزيد احتمالية الاصابة بيه لو حد فى العيلة اتصاب بيه قبل كدة، فلو حسيت باى من الاعراض اللى فوق وحد من اهلك كان عنده سكر يبقى لازم تكشف. احجز دلوقتى عند دكتور غدد صماء من على موقعنا 

References:

http://diply.com/early-warning-signs-diabetes-you-should-not-ignore?config=13

https://www.woundcarecenters.org/article/wound-types/diabetic-wounds