الحساسية: أسبابها وإزاي نعالجها

الحساسية من مسببات المرض الشائعة
مسببات الحساسية كتيرة منها أطعمة أو حبوب لقاح أو أدوية.

الحساسية عبارة عن إيه؟

الحساسية بتحصل لما الجسم بيتعرف على مادة معينة على إنها ضارة، ويبدأ الجهاز المناعي يحاربها وينتج مادة الهيستامين؛ المادة الكيميائية المسؤولة عن ظهور أعراض الحساسية زي( الإلتهاب، العطس، الكحة...).
الحساسية البسيطة بتتعالج في البيت أو من خلال أدوية الحساسية اللي بتتصرف من غير روشتات ، أما الحساسية القوية أو المزمنة بتحتاج علاج طبي والمتابعة عند طبيب متخصص. وفي حالات خطيرة في الحساسية تحتاج الطوارئ.

إزاي نعالج الحساسية؟

معظم أعراض الحساسية بتتعالج في البيت أو بإستخدام الأدوية اللي بتتصرف من غير روشتة.
طرق العلاج التالية شائعة جدًا في تقليل أعراض الحساسية:

مضادات الهيستامين

مضادات الهيستامين بتساعد في علاج الأعراض البسيطة للحساسية بغض النظر عن سبب الحساسية. الأدوية دي بتقلل إنتاج الجسم للهيستامين وبالتالي بتقلل أعراض الحساسية.
الجيل التاني من مضادات الحساسية أفضل من الجيل الأول لإن أثاره الجانبية أقل.
مضادات الهيستامين بتيجي في أكتر من شكل : أقراص للبلع، بخاخة للأنف، سائل، قطرات للعين.
بعض الناس اللي عندها حساسية من حاجة معينة بتاخد مضادات الهيستامين قبل تعرضها للمواد اللي بتسببلها الحساسية، زي الحساسية الموسمية أو حساسية الحيوانات الأنفية.
لو حامل أو عندك مرض في الكبد مينفعش تاخد مضادات الهيستامين إلا بإذن الطبيب.

مزيلات إحتقان الأنف

سواء أقراص أو سوائل أو بخاخات؛ الأدوية المزيلة للإحتقان بتقلل أعراض الجيوب الأنفية والأعراض المصاحبة ليها زي إحتقان الحلق أو الكحة واللي بيكون سببهم الحساسية.
الأدوية المزيلة لإحتقان الأنف متتاخدش بإستمرار لمدة أزيد من 72 ساعة.

مضادات الإلتهاب

مضادات الإلتهاب  اللاستيرويدية من الممكن إنها تستخدم في تخفيف الألم والتورم بشكل مؤقت.

الإبتعاد عن مسببات الحساسية

أفضل طريقة لعلاج ومنع حدوث الحساسية هو معرفة إيه اللي بيسبب الحساسية والبعد عنه، بالذات مسببات الحساسية من الأطعمة عشان سهل منعها.
لو من الصعب منع التعرض لمسببات الحساسية، يفضل تناول مضادات الهيستامين أو مزيلات إحتقان الأنف قبل التعرض لمسبب الحساسية.

إستخدام غسول الجيوب الأنفية

لما الحساسية تعمل مشاكل في الجيوب الأنفية، من المقترح إن الشخص يستخدم غسول للجيوب الأنفية لتنظيف مجرى التنفس وإزالة مسبب الحساسية منه.
لتحضير غسول الجيوب الأنفية:
-إخلط 3 ملاعق صغيرة من الملح(الخالي من اليود) مع ملعقة صغيرة بكينج صودا.
-ضيف ملعقة صغيرة من الخليط ده على 8 أوقية من الماء المغلي (224:240 جرام).
-ذوب الخليط في الماء وبعدين إستخدمه كغسول.

علاج الحساسية الناتجة عن البيئة

مسببات الحساسية الموجودة في الهواء زي التراب أو حبوب اللقاح ممكن نستخدم معاها طرق علاج زي:
- أقراص إستحلاب الحلق المضاف ليها مواد ملطفة زى المنثول، أو العسل، أو الزنجبيل.
- الإستحمام وغسل الملابس بعد التعرض لمسبب حساسية عشان نزيل أثره لو لسه على الملابس أو الجسم.
-الرياضة لعدة دقايق بتساعد في تقليل إحتقان الأنف.

معالجة حساسية الجلد

الحساسية اللي بتحصل في الجلد نتيجة لمسببات حساسية مختلفة زي لعاب الحيوانات أو الأدوية أو الكيماويات أو النباتات السامة ممكن نستخدم معاها طرق علاج زي:
- إستخدام كريمات فيها كورتيزون، بيقلل الإلتهاب والهرش. يفضل إستشارة الطبيب قبل إستخدام الأدوية المحتوية على كورتيزون.
- كريمات مرطبة بتهدأ تفاعل الحساسية في الجلد.
- أدوية اللدغات بتقلل تفاعل الحساسية الناتج عن اللدغات أو اللسعات.
- كمادات ماء بارد على مكان الإلتهاب لمدة 10: 15 دقيقة بيقلل الإلتهابات.

معالجة الحساسية الشديدة

من الأفضل إستشارة الطبيب في حالة الحساسية الشديدة أو الحساسية المزمنة
الطبيب هيوصف أدوية أقوى من أدوية الحساسية العادية تناسب حالة كل شخص.
خيارات العلاج في الحساسية الشديدة أو المزمنة تشمل:
- العلاج بالخلايا الجذعية.
- أدوية الربو زي موسعات الشعب الهوائية أو إستنشاق الكورتيزون.
- علاجات تقليل الحساسية لمسببات حساسية محددة.

العلاجات الطبيعية للحساسية

• إتباع نظام غذائي منخفض الدهون، يحتوي على نسبة عالية من الكربوهيدرات المعقدة، مثل الفول والحبوب الكاملة والخضروات، من الممكن أن يقلل من الحساسية.
• زيت بذر الكتان والزنك وفيتامينات أ ، جـ ، هـ ؛ لتحسين أعراض الحساسية.
• العلاج بالوخز بالإبر قد يساعد بعض الناس على تخيف الأعراض.
  

التعرف على الحساسية المفرطة وصدمة الحساسية وعلاجهم

الحساسية الشديدة ممكن تؤدي لحالة بتتسمى صدمة الحساسية؛ وهي حالة خطيرة جدًا.
بتحصل صدمة الحساسية لما إستجابة جهاز المناعة لمسبب الحساسية تكون قوية جدًا ومفاجأة وده بيخلي الجسم في حالة من الصدمة.
لو متعالجتش ممكن تأدي لغيبوبة ومضاعفات خطيرة أو تسبب الوفاة.
الأعراض الأولية لصدمة الحساسية بتكون بسيطة بس بتدهور بسرعة وتزداد سوء، وبتشمل:
- قلق غير مبرر.
- شعور بتنميل في كف الأيد وباطن القدم والشفتين.
- تورم اللسان والحلق والفم والوجه.
- صعوبة في التنفس.
- نبض سريع وضعيف.
- إنخفاض ضغط الدم.
- القئ أو الإسهال.
- إرتباك.
- فقدان الوعي.
- جلد شاحب.
- نوبة قلبية.

لو شكيت في حدوث صدمة الحساسية فورًا اتصل بالإسعاف واطلب المساعدة الطبية الطارئة.
لو الشخص المصاب معاه قلم Epipen (وهو عبارة عن جرعة إيبينيفرين قابلة للحقن الذاتي مصممة لعلاج الحساسية المفرطة ) احقنهوله في الفخذ في أسرع وقت ممكن.

الإسعافات الأولية في حالة صدمة الحساسية:
- هدئ الشخص وخليه يسترخي
- خلي الشخص يستلقي على ضهره ويرفع قدمه
- تأكد إن هدوم الشخص مش ضيقة ومسبباله تعب اضافي
- متديهوش أكل أو شرب حتى لو هو طلب كده
- لو فقد الوعي ومش بيتنفس والنبض اختفى، ابتدي في الإنعاش القلبي الرئوي CPR

كتير من الناس بيواجهو حساسية لأسباب مختلفة من أول حبوب اللقاح أو وبر الحيوانات الأليفة لحد الأطعمة والمشروبات أو منتجات العناية الشخصية.
أفضل طريقة لعلاج الحساسية بتعتمد على معرفة السبب وبالتالي البعد عنه أو استخدام دوا مناسب، ومعظم حالات الحساسية بتكون بسيطة.
في حالات الحساسية الشديدة أو المزمنة؛ لازم الشخص المصاب يطلب الرعاية الطبية فورًا، بالذات لو حصل تورم في الحلق أو تغير في معدل ضربات القلب، صدمة الحساسية تعامل كحالة طبية خطيرة.
لو عندك حساسية وحابب تطمن على صحتك وتعرف العلاج المناسب ليك عشان تفضل بصحة جيدة وميحصلش مضاعفات.. احجز عند دكتور من الدكاترة الحساسيه و المناعه الموجودين على موقعنا

المراجع:

https://www.medicalnewstoday.com/articles/321500.php#outlook
https://www.mayoclinic.org/diseases-conditions/hay-fever/in-depth/seasonal-allergies/art-20048343