مع دخول الشتاء بنواجه انتشار امراض بعينها زي البرد والانفلونزا، هنعرف في المقال ده ايه الفرق بين البرد والانفلونزا وإزاي نحمي نفسنا من الإصابة بالفيروسات المسببة ليهم

:البرد والإنفلونزا وأمراض الشتاء

البرد أو الإنفلونزا ممكن يجوا في أي وقت في السنة مش بس الشتاء لكنهم بيجو في الشتاء أكتر بسبب إن الفيروسات المسببة ليهم بتنتشر بسهولة في درجات الحرارة المنخفضة، والهواء البارد بيبطئ عملية إزالة المخاط من مجرى التنفس فالميكروب يفضل في الجسم فترة أطول
بالإضافة إن تعرض الجسم للبرد والهواء غير الرطب بيأثر على قوة جهاز المناعة وقدرته على محاربة الباكتيريا : والفيروسات لأسباب كتيرة منها
قلة فيتامين د لعدم التعرض للشمس بشكل كافي، لأن فيتامين د ليه دور في تحفيز عمل الجهاز المناعي
إنخفاض درجة الحرارة بيأثر على رد الفعل المناعي لخلايا المناعة ضد الأجسام الضارة اللي بتهاجم جسمنا
ضيق الأوعية الدموية في مجرى التنفس للحفاظ على درجة حرارة الجسم، وده بيخلي كرات الدم البيضاء المسؤولة عن المناعة تتأخر في الوصول لمكان الميكروب

:أعراض البرد

إنسداد الأنف أو سيلانها-
كحة-
إلتهاب الحلق-

:أعراض الإنفلونزا

: نفس أعراض البرد لكن أشد بالإضافة إلى
_إرتفاع درجة الحرارة
_صداع
_وجع في المفاصل
_إرهاق
_تعرق
-الإنفلونزا ممكن تيجي في أي وقت في السنة لكن بتزداد إحتمالية الإصابة بيها في أشهر الشتاء على الترتيب: فبراير،ديسمبر، مارس، يناير
تطعيم الإنفلونزا السنوي بيحمي من الإصابة بفيروس الإنفلونزا بتاخده الفئة المعرضة للإصابة بالفيروس أكتر من غيرها زي: كبار السن، الأطفال أكبر من 6 شهور،الأشخاص اللي مناعتهم قليلة لسبب مرضي ولازم استشارة الطبيب قبل أخذه
علاج البرد والإنفلونزا بيكون علاج للأعراض زي خافض للحرارة في حال إرتفاعها،أو مسكن للألم في حالة الألم ، الشديد، لإن البرد أو الإنفلونزا بيخفوا لوحدهم ،واستخدام المضاد الحيوي غلط في حالات الإصابات الفيروسية

:نوروفيروس

هو واحد من أكتر الفيروسات إنتشار في الشتاء، بيجي في الجهاز الهضمي وبيسبب غثيان وقئ و مغص و إسهال
في حالات فقد السوائل زي الترجيع والإسهال، لازم نعوض الفقد بشرب سوائل كتيرة ،أو محلول معالجة الجفاف

إزاي نحافظ على صحتنا وحيويتنا في الشتاء؟

• غسل الايد بالماية والصابون بإستمرار بالذات قبل الأكل وبعد الخروج من الحمام، غسيل الايد بإستمرار بيقلل إحتمالية إصابتك بنزلات البرد، لإنك بتتخلص من الميكروبات اللي جت في إيدك من تعاملك اليومي زي لمس الأسطح أو السلام على حد مريض
• منلمسش العين أو الأنف أو الفم إلا وإيدنا نضيفة
• ناخد قسط كافي من النوم
• الراحة والبعد عن الضغوطات النفسية
• المحافظة على الأكل الصحي زي: الحبوب الكاملة، والأسماك، والدواجن، و الأعشاب ، والفاكهة، والخضروات المكسرات، والأكل الغني بفيتامين د
• المحافظة على التمارين الرياضية البسيطة كل يوم
• شرب الماية كتير بيحافظ على الجسم من الجفاف وبينقيه من السموم
• المحافظة على نظافة المكان الموجودين فيه
• لبس ملابس تقيلة جافة، وكوفية لتغطية الأنف والفم في حالة البرد الشديد
• التعرض الكافي للشمس للحصول على فيتامين د
• العطس أو الكحة في منديل ورقي ورميه مباشرة،لو مفيش منديل يبقا في الجزء الداخلي للكوع مش في كف الايد عشان لو عندك الفيروس متنشروش لغيرك
• الراحة في البيت لما تحس ببداية تعب، منروحش الشغل ولا الأطفال تروح المدارس
• العناية بالأطفال يلبسوا طبقة هدوم أزيد مننا
• عدم الخروج فجأة من مكان دافي لمكان بارد، وفي الحالة دي المضمضة بماية دافية مدوب فيها معلقة صغيرة ملح تعمل كمضاد إلتهاب لعدم الإصابة بإلتهاب الحلق
• إستخدام مرطبات للجلد، أفضل وقت لوضعها هو قبل النوم أو بعد الإستحمام
• الإستحمام بماية دافية أفضل من السخنة
• لمرضى المفاصل خلي مفاصلك دافية
• شرب الأعشاب الدافية مفيد في حالات الإصابة بالبرد أو الإنفلونزا
  
  

إمتى أروح للدكتور؟

شخص كبير في السن أو مناعته ضعيفة
لو الأعراض بتزداد بمرور الأيام ومفيش علامات تحسن
درجة الحرارة مرتفعة لأكتر من أربع أيام
عند الشعور بضيق في التنفس وألم في الصدر

لو شاكك ان عندك اعراض البرد اوالإنفلونزا تقدر تحجز عند دكتور باطنه شاطر من خلال موقعنا .

referances:

https://www.medicalnewstoday.com/articles/15107.php
https://www.medicalnewstoday.com/articles/166606.php
https://www.medicalnewstoday.com/articles/320099.php
https://www.medscape.com/viewarticle/901766_5