احمي نفسك من سرطان الثدي في 5 دقايق باستخدام مراية

استخدمى مرايتك عشان تحمى نفسك من سرطان الثدى ، اعملى الخطوات اللى جاية دى بشكل اسبوعي عشان تكتشفي اعراض سرطان الثدي بدرى.

الاعراض اللى تخلي بالك منها وانت بتعملي الفحص الذاتى :

1. تكتل او ورم 
   1. وجود "كلكعة" او تكتل فى جزء من الثدى فبتحسى أن نسيجه مختلف عن الأنسجة المحيطة بيه، وغالباً مش بتكون مؤلمة.
   2. ممكن تحسى بتورم تحت الإبط، بس خلى بالك انه ممكن يكون تورم فى الغدد الليمفاوية مش سرطان وفي الحالة دي الدكتور هو اللي هيقدر يحدد.
2. تغيير فى حجم أو شكل الثدى
   1. اي تغيير عن المعتاد في حجم او شكل الثدي ممكن يكون علامة على سرطان الثدي وممكن تتأكدي عن طريق الفحص اللي هتعمليه لنفسك.
   2. تغير فى بشرة الثدى بحيث يكون فيه ثقوب شبه قشرة البرتقالة
3. حلمة الثدى 
   1. لاحظى لو خرج افرازات من حلمة الثدى خاصة لو افرازات دموية
   2. تغيير فى مكان الحلمة لليمين او الشمال
   3.  هتلاقى الحلمة مقلوبة ( بقت داخل الثدى مش للخارج كالعادة )
   4. لو لقيتى تشققات او قشور فى الحلمة

الخطوة الأولى : 

اقفى قدام المراية فى اضاءة قوية ، ظهرك مفرود وكتفك مستقيم ، وايديك على اول الفخذين. لاحظى الثديين: حجمهم ولونهم طبيعيين ، شكلهم طبيعى بدون اى تشوه او تورم

الخطوة الثانية :

قدام المراية ، ارفعى ايديك لفوق ولاحظى نفس التغيرات فى الخطوة اللى فاتت.

الخطوة الثالثة : 

وانتى باصة فى المراية خدى بالك لو فيه اى افرازات من الحلمات ، ممكن تكون افرازات مياه شفافة ، او صفراء ، او دموية.

بعيد عن المراية ، اعملى الخطوات دى عشان تكشفى على كل مكان فى ثديك:

الخطوة الرابعة :

نامى على ضهرك ، بإيدك اليمين اضغطى على ثديك الشمال ، والعكس.

اضغطى بهدوء وثبات على كل جزء من الثدى، بداية من الحلمة وبعدين ابعدى عنها بحركات دائرية لحد ما توصلى لابعد جزء من الثدى عن الحلمة. اتأكدى انك ضغطتى على الثدى كله ، من عظمة الترقوة لحد بداية عضلات البطن، ومن الإبط ولحد نص الصدر.

اتأكدى انك وصلتى لكل طبقات الأنسجة فى الثدى:

1. أنسجة بشرة الثدى والأنسجة القريبة هتوصلى لها بالضغط البسيط
2.  الأنسجة الداخلية هتوصلى لها بالضغط المتوسط
3. اضغطى بشكل أقوى عشان توصلى للأنسجة العميقة للثدى. هتعرفى انك وصلتى للأنسجة العميقة لما تحسى بالقفص الصدرى.

الخطوة الخامسة :

اضغطى على الثدى بنفس الحركات وانتى واقفة. بعض السيدات بيحسوا بالثدى بشكل أكبر لما يكون مبلل ، فممكن تعملى الاختبار دة اثناء الاستحمام .

وتأكدى انك غطيتى كل اجزاء الثدى بالضغط بكل المستويات اللى شرحناها فى الخطوة الرابعة.

ولو قلقانة او مش متأكدة من نتيجة الفحص الذاتي احجزي عند دكتور الاورام من الدكاترة المتخصصين من على موقعنا:

References :

• https://www.breastcancer.org/symptoms/testing/types/self_exam/bse_steps