احسن 9 وسائل لمنع الحمل ومميزات وعيوب كل وسيلة منها

وسائل منع الحمل هي الطرق الفعالة لتنظيم الأسرة والابتعاد عن الحمل أو تأجيله لحد الوقت المناسب، وكمان الطرق دي في منها اللى بيساعد على الوقاية من الأمراض اللي بتتنقل من خلال الممارسة الجنسية. في أنواع كتير من وسائل منع الحمل عشان تتناسب مع احتياجات كل فرد ودي معظم الوسائل مميزاتها وعيوبها

 وسائل منع الحمل

1. جهاز اللولب داخل الرحم: عبارة عن جهاز بلاستيك صغير على شكل حرف الT الدكتور بيحطه جوه الرحم. نوع الجهاز بيختلف على حسب الطريقة اللى بيمنع بيها الحمل. يعني في جهاز بيمنع الحيوان المنوي من تخصيب البويضة، وفي جهاز بيغير من شكل وتكوين بطانة الرحم عشان تكون غير مناسبة لاستقرار البويضة المخصبة، وفي أجهزة بتغير من إفرازات الرحم عشان تمنع دخول الحيوان المنوي للبويضة.
   المميزات: 

1. فعال بنسبة 99%
2. ممكن يقعد في الرحم لمدة توصل ل12 سنة في حالة جهاز النحاس، أو ل 5 سنين في حالة الجهاز الهرموني.
3. فعاليته عالية في منع الحمل.
4. سهل الاستخدام لأنه بيتحط مرة ويتنسى.
5. مش هتشوفيه ولا هتحسى بيه الا نادرا.

العيوب: 

1. مش بيحمي من الأمراض الللي بتتنقل بالممارسة الجنسية.
2. تكلفته عالية ولازم دكتور هو اللي يركبه.
3. ممكن يسبب نزيف غير منتظم.

1. الزرعات: هي عبارة عن عصاية بلاستيك لينة صغيرة بتتزرع تحت جلد الذراع وبتفرز هرمون البروجسترون الصناعي على مدار 3 سنين. الهدف منها في الأساس هو منع المبيضين من إفراز البويضات.
   المميزات:

1. فعالة بنسبة 99%
2. فعالة لمده توصل ل3 سنين.
3. استخدامها سهل ومناسب.

العيوب:

1. تكلفة عالية ولازم دكتور يركبها ويشيلها.
2. مبتحميش من الأمراض اللي بتتنقل جنسياً.
3. في خطورة للعدوى أثناء تركيبها أو إزالتها.
4. تغيير في الدورة الشهرية وعدم انتظام النزيف.

1.  التعقيم(عمل عقم): هو وسيلة دائمة لمنع الحمل عن طريق قطع أو سد القنوات اللي بتحمل البويضات في الأنثى أو القنوات اللي بتحمل الحيوانات المنوية في الذكر.

المميزات: 

1. فعال بنسبة 99%
2. وسيلة ناجحة وفعالة للناس اللي مش عايزة تخلف تاني.
3. مش بتتطلب مقاطعة الممارسة الجنسية.

العيوب: 

1. مش بتحمي من الأمراض المنتقلة جنسياً.
2. عملية جراحية يقوم بيها دكتور متخصص.
3. تكلفة عالية بسبب العملية الجراحية.
4. ممكن يكون في خطورة أثناء العملية.
5. خطوة دايمة، يعني لازم يكون الشخص متأكد تماماً انه مش عايز يخلف في المستقبل.
   
   

4.  حقن الهرمونات: عبارة عن حقن لهرمون البروجسترون بتتاخد في نفس المعاد كل 12 أسبوع لمنع البويضات من انها تخرج للرحم.

المميزات: 

1. فعالة بنسبة أكتر من 91% 
2. بتتاخد مرة كل 12 أسبوع، يعني 4 مرات في السنة.
3. بتقلل خطورة الإصابة بسرطان جدار الرحم.
4. بعد كذا مرة من الحقن، بعض الستات بتتوقف عندهم الدروة الشهرية.
5. مش بتحتاج مقاطعة الممارسة الجنسية لاستخدامها.

العيوب: 

1. مش بتمنع الأمراض اللي بتتنقل جنسياً.
2. ممكن تسبب نزيف غير منتظم.
3. بتحتاج زيارة للدكتور.
4. ممكن تضعف العظام لأنها بتقلل النسبة الطبيعية للاستروجين في الجسم.

5.  اللزقات الهرمونية: عبارة عن لزقة صغيرة بتتحط على الجلد وبتفرز هرمونات بشكل منتظم.

المميزات:

1. فعالة بنسبة أكتر من 91%
2. سهلة في الاستخدام وبتحتاج تتغير مرة في الأسبوع.
3. مش بتحتاج مقاطعة الممارسة الجنسية لاستخدامها.

العيوب:

1. لازم تتغير كل أسبوع في نفس المعاد.
2. لازم الدكتور هو اللي يوصفها.
3. مش بتحمي من الأمراض اللي بتتنقل جنسياً.
4. ممكن تسبب نزيف غير منتظم.
5. مينفعش تستخدميها لو عندك مشاكل في تجلط الدم.

6. الحلقة المهبلية: عبارة عن حلقة بلاستيك لينة بتتحط في المهبل وبتفرز نسب معينة وثابتة من الهرمونات الجنسية.

المميزات:

1. فعالة بنسبة أكتر من 91%
2. بتساعد على تقليل حبوب الشباب وعلاجها.
3. الدورة الشهرية بتبقى منتظمة أكتر وأخف وأقل في الألم.
4. مش بتحتاج مقاطعة الممارسة الجنسية لاستخدامها.
5. ممكن إزالتها في حالة الرغبة في الحمل.

العيوب:

1. مش بتحمي من الأمراض اللي بتتنقل جنسياً.
2. لازم الدكتور هو اللي يوصفها.
3. لازم تتشال وتتحط تاني كل شهر.
4. مينفعش تستخدميها لو عندك مشاكل في تجلط الدم.

7. حبوب منع الحمل: هي مجموعة من الحبوب بتتاخد كل يوم بانتظام في نفس المعاد، وبتحتوي على هرمونات الاستروجين والبروجسترون عشان تمنع المبيضين من إفراز البويضة.

المميزات: 

1. فعالة بنسبة أكتر من 91%
2. ممكن توقفيها في حالة الرغبة في الحمل.
3. بتقلل آلام الدورة الشهرية وبتخليها منتظمة وأخف.
4. بتقلل حب الشباب.
5. بتقلل نسبة الإصابة بسرطان المبيضين وجدار الرحم.
6. رخيصة وتكلفتها قليلة.

العيوب: 

1. مش بتحمي من الأمراض اللي بتتنقل جنسياً.
2. ممكن تتعارض مع بعض الأدوية.
3. ممكن تسبب بعض الأعراض الجانبية زي تغير في المزاج، لكنها بتروح بعد كام شهر.
4. لازم تتاخد في نفس المعاد بالظبط كل يوم.
5. الدكتور هو اللي بيوصفها.
6. مينفعش استخدامها من المدخنات بعد سن ال35 أو الناس اللي عندهم مشاكل في تجلط الدم.

 8. الواقي الذكري: عبارة عن غلاف رقيق بيستخدمه الرجل لمنع خروج الحيوانات المنوية ومنع وصولها للمهبل.

المميزات:

1. بيحمي من الأمراض المنتقلة جنسياً.
2. رخيص ومتوفر في أي مكان بدون وصف من الدكتور.

العيوب:

1. بعض الناس عندهم حساسية من مادة اللاتيكس المصنوع منها أو من السائل المستخدم في تغليفه.
2. بيحتاج مقاطعة الممارسة الجنسية لاستخدامه.
3. مش مفضل عند بعض الناس لأنه بيغير من الإحساس خلال الممارسة الجنسية.
4. فعاليته أقل من 80% لأنه ممكن يتقطع خلال الاستخدام.

9. حواجز عنق الرحم: الحاجز عبارة عن قطعة مطاطية صغيرة بتتملى بسائل يقتل الحيوانات المنوية لمنعها من دخول الرحم وبتتحط في عنق الرحم قبل الممارسة الجنسية.

المميزات: 

1. مش بتستخدم الهرمونات.
2. ممكن استخدامها أكتر من مرة.
3. بتحمي من بعض الأمراض المنتقلة جنسياً.
4. ممكن استخدامها خلال 24 ساعة قبل الممارسة الجنسية عشان كدة مش بتقاطع الممارسة الجنسية.

العيوب: 

1. ممكن تتحرك خلال الممارسة الجنسية.
2. ممكن تسبب ريحة مش محببة وإفرازات مهبلية.
3. محتاجة وصف من الدكتور.
4. بعض الناس عندهم حساسية من المادة المصنوع منها الحاجز أو من السائل المستخدم.

لو مش متأكدة من وسيلة الحمل المناسبة ليكي او حابة تستشيري دكتور هتلاقي دكاترة نساء وتوليد كتير على موقعنا وممكن تحجزي عند دكتور نساء وتوليد في الوقت اللي يناسبك:

References:

https://www.healthline.com/health/birth-control#pros-and-cons