9 انواع اكل بتزود حب الشباب و 16 طريقة لعلاج حب الشباب في البيت

حب الشباب هو حالة جلدية بتحصل لـ حوالي 10% من سكان العالم. في عوامل كتير بتساهم في ظهور حب الشباب زي العوامل الوراثية والهرمونات وبعض أنواع البكتيريا وانسداد مسام البشرة والتهابها، وكمان بعض أنواع الأكل ممكن تساعد بشكل كبير في ظهور حب الشباب زي ما أثبتت بعض الدراسات مؤخراً. ومن ضمن أنواع الأكل دى:

1. الحبوب المكررة والسكر
   زي خبز الدقيق الأبيض (العيش الابيض والفينو) والمكرونة لأنهم بيتكسروا في الجسم وبيعلوا مستوى السكر في الدم وده بيساعد على ظهور الحبوب، وكمان السكر بيساعد على الالتهابات وبيسرع انتشار حب الشباب.
2. منتجات الألبان
   زي الأجبان والأيس كريم لأن فيها هرمونات بتحفز إفراز الدهون الجلدية المسببة لحب الشباب، وبتحتوي على هرمونات النمو اللي بتحفز الإفراز الزائد لخلايا الجلد وبالتالي بتعمل انسداد للمسام وحبس لزيوت البشرة فبتظهر الحبوب.
3. الأكل السريع
   زي البطاطس والبرجر والشيبسي والبيتزا لان فيهم دهون مشبعة وكربوهيدرات مكررة اللي بتعطل عمل الهرمونات وبتسبب زيادة في إفراز الدهون اللي بتأدي لظهور حب الشباب.
4. الأطعمة الغنية بدهون أوميجا-6
   زي الفشار وزيت الصويا وزيت عباد الشمس وزيت الذرة لانهم بيسببوا تهديد للبشرة عشان كده يفضل تجنبهم. وكمان بعض المكسرات والحبوب زي عين الجمل وبذور السمسم الغنية بدهون أوميجا-6 ممكن تسبب مشاكل للبشرة لو اتاخدوا بكميات كبيرة.
5. اللحوم الغير عضوية
   زي اللحم البقري ولحوم الدواجن اللي مش بتتغذي على النباتات لأنها ممكن تسبب مشاكل للبشرة. لحوم الحيوانات اللي بتاخد هرمونات ومضادات حيوية تعتبر مصدر مش كويس للحوم الصحية لأنها بتعمل خلل في الهرمونات وبتزود البكتيريا في الجسم.
6. الكافيين والسجائر
   لأن الكافيين بيزود مستوى الكورتيزون في الجسم فبيعلى مستوى الأنسولين اللي بيعتبر محفز لإنتاج دهون البشرة وبالتالي حب الشباب.
7. الطعام المعلب وخلطات الكيك والنودلز
   لان فيهم مواد كيمائية وإضافات صناعية ومكسبات الطعم اللي ممكن تسبب حساسية للجلد وتأذيه، وكمان بتحتوي على الدهون المشبعة اللي بتزود إنتاج دهون البشرة.
8. الأكل المقلي زي الوافل والبان كيك
   لان فيهم كمية كبيرة من الزيوت أثناء القلي خاصة الزيوت النباتية لأنها بتساعد على زيادة إفرازات الجلد وظهور حب الشباب.
9. مشروبات الطاقة زي الريد بول والبيبسى بانواعه
   لأنهم مصنوعين بشكل أساسي من السكر اللي بيساعد على ظهور حب الشباب.

ممكن نعالج حب الشباب في البيت لو كانت حالته بسيطة أو متوسطة عن طريق بعض الطرق باستخدام مكونات منزلية سهلة، الطرق دي فعالة لو استخدمناها بالطريقة الصح وبانتظام مع الحفاظ على نظام غذائي بعيد عن الأطعمة اللي قولناها. من ضمن الطرق دي:

1. الشاي الأخضر والشمر
   نقع معلقة صغيرة من الشمر في شوية مياه لمدة 5 دقايق وبعدين نصفى حبوب الشمر ونحط على المياه شاي أخضر ومعلقة صغيرة عصير ليمون، ونشرب الخليط ده كل يوم الصبح.
2. خل التفاح وعصير الليمون
   بتخفيف خل التفاح لحد ما يوصل لتركيز قليل جداً ونحط عليه كمية من عصير الليمون ونشرب من الخليط ده قبل الوجبات.
3.  جل الصبار
   بيستخدم مرتين في اليوم على الوش لأنه له خواص معالجة لأثار الحبوب.
4. الخيار
   يتهرس ويتحط على البشرة أو مناطق الحبوب لمدة نص ساعة وبعدين يتغسل.
5. الطماطم
   بتتقطع لشرايح وتتحط على مناطق الحبوب لمدة 15 دقيقة وبعدين تتغسل بمياه دافية.
6. بياض البيض
   بيتحط على مناطق الحبوب طول الليل ويتغسل الصبح.
7. الليمون
   نقطع الليمونة نصين ونفرك بيها المنطقة المصابة بالحبوب قبل النوم وتتغسل الصبح.
8. الثوم
   بيستخدم لعلاج الحالات الشديدة للحبوب وعلاج آثارها.
9. أوراق الحلبة
   نعمل منها خليط يتحط على الحبوب طول الليل ويتغسل الصبح.
10. العسل
    نغسل الوش بمياه دافية الأول عشان نفتح المسام وبعدين نحط العسل على الوش لمدة نص ساعة بعدها يتغسل.
11. صودا الخبز
    نستخدمها لإزالة الزيوت الزيادة في البشرة وإزالة الجلد الميت، وكمان بتغير حمضية البشرة عشان تخليها غير مناسبة لنمو البكتيريا.
12. النشا
    بيتمزج مع المياه لتكوين عجينة بتتحط على البشرة كماسك لامتصاص الزيوت الزايدة عن الجلد.
13. مياه الأكسجين
    مضاد قوي للبكتيريا وبيشيل طبقة الزيوت اللي بتغطي الجلد وبيساعد على التقشير السريع للجلد وتكوين طبقة جديدة، بس لازم يستخدم بتركيز قليل جداً لأنه بيسبب تفتيح مؤقت للون الجلد وتفتيح لون الشعر وجفاف في الجلد.
14. بنزويل بيروكسيد
    برده مضاد قوي للبكتيريا وله نفس فعالية مياه الأكسجين.
15. حمض السالسليك
    مضاد للالتهابات ومضاد ضعيف للبكتيريا، بيكسر الكيراتين الزيادة في البشرة وبيشيل الرؤوس البيضاء والسوداء، بيقفل مسام البشرة وبالتالي بيقلل انسدادها بسبب الأتربة والبكتيريا، بيساعد على تقشير الجلد للتخلص من أثار الحبوب والجلد الميت وبيقلل التهابات الحبوب.
16. حمض السلفر وحمض ألفا هيدروكسيد
    حمض السلفر عامل مضاد للبكتيريا وبيساعد على تصنيع الأحماض الأمينية اللازمة لخلايا الجلد. بينما حمض ألفا هيدروكسيد بيستخدم في مستحضرات التجميل بسبب خواصه القابضة للمسام، وبيعمل على تقشير الطبقة السطحية للجلد لإزالة الجلد الميت.

لو بدأت تظهر لك حبوب ومش عارف تتصرف فيها ، احجز عند  دكتور جلدية من على موقعنا عشان يساعدك تتخلص من الحبوب من غير ما تسبب لك اى مشاكل فى البشرة 

References:

https://www.stylecraze.com/articles/foods-that-cause-acne/#gref

http://www.progressivehealth.com/content/default.asp?box=2&utm_expid=4620948-109.j1n3XkdFRwenwyGM_IVZ2Q.2&utm_referrer=https%3A%2F%2Fwww.google.com.eg%2F