تساقط الشعر هي عملية طبيعية لاستبدال الشعر، لكنها بتحصل بمعدل معين، حوالي 100 شعرة بتقع في اليوم مع الحفاظ على كثافة الشعر بمرور السنين، لكن لو المعدل زاد والشعر بدأ يخف مع الوقت يبقى في مشكلة لازم نعالجها عشان نوقف التساقط الزيادة للشعر ونحفز نمو الشعر مرة تانية. 

بالرغم من ان العلماء مقدروش يعرفوا بالظبط ايه الأسباب اللي بتخلي بعض بصيلات الشعر ليها عمر افتراضي أقل من غيرها، لكن لقوا بعض الأسباب اللي بتعمل تساقط للشعر.

 أسباب تساقط الشعر

1. أسباب هرمونية: خلل في إفراز بعض الهرمونات زي التستوستيرون.
2. الجينات: العلماء لقوا ان في جينات للصلع محمولة على جينات النوع عند الستات والرجالة وان جينات الصلع دي هي اللي بتخلي نسبة الصلع عند الرجالة أكبر من الستات.
3. الضغط العصبي أو المرض أو الولادة: دي عوامل ممكن تسبب تساقط الشعر أو تخليه معرض أكتر للالتهابات الفطرية اللي برده بتأثر على نموه ووقوعه.
4. الأدوية: زي أدوية وبعض أدوية علاج الضغط وحبوب منع الحمل وأدوية العلاج الكيميائي لعلاج السرطان، كل دول ممكن يسببوا تساقط مؤقت للشعر.
5. الحروق والجروح والتعرض للأشعة السينية: ممكن يسببوا تساقط مؤقت للشعر، في الحالة دي الشعر بيرجع ينمو بشكل طبيعي تاني بعد ما الجروح تلتئم إلا لو عملت ندبة واللي بتمنع نمو الشعر في مكانها.
6. أمراض المناعة: بعض أمراض المناعة ممكن تأثر على الشعر وتمنع نموه أو تسبب نمو لشعر خفيف جداً ولونه أفتح من الطبيعي.
7. بعض مستحضرات التجميل: زي الاستعمال الزيادة للشامبو في غسيل الشعر وتشقير الشعر أو صبغه، كل ده ممكن يؤدي لنمو شعر خفيف وهش وضعيف وممكن مع الوقت يتساقط، لكنه بيرجع لطبيعته تاني بعد ما نوقف العوامل دي. الأسباب دي مش بتسبب صلع لكنها بتأذي الشعر بشكل كبير والدمار الشديد للشعر وفروة الرأس ممكن في بعض الأحيان يسبب صلع فعلاً.
8. بعض الأمراض: زي أمراض الغدة الدرقية، الذئبة الحمراء، السكر، وأنيميا الحديد ممكن يسببوا سقوط الشعر، لكن بمجرد ما المرض يخف، الشعر بيرجع تاني زي ما كان إلا لو حصل ندبات زي في حالة مرض الذئبة الحمراء.
9. النظام الغذائي: لو كان قليل في البروتين أو في نقص شديد في السعرات الحرارية بيحصل تساقط مؤقت للشعر لحد ما الحالة تخف.

برغم انك متقدرش تمنع أو تعالج الصلع الطبيعي لكن ممكن تحمي شعرك من الدمار والعوامل اللي بتأدي في النهاية للصلع أو بتسرع العملية دي.

أسرار لعلاج تساقط الشعر

1. سيب شعرك على طبيعته: يعني بدون صبغات أو مواد فرد كيمائية، وبلاش الحرارة المستخدمة في السيشوار والمكواة. سيب الشعر يرتاح شوية من الحرارة والصبغات والكيمياويات اللي بتضره.
2. استخدم منتجات عناية بالشعر تكون واثق فيها وطبية: ومفيهاش مواد كيميائية ضارة بالشعر، وكمان استخدم نوع الشامبو المناسب لطبيعة الشعر.
3. سرح شعرك باستخدام فرشة متكونش قاسية عليه: وسرح بلطف من الجذور للأطراف، و متسرحش الشعر وهو مبلول وغرقان مياه لأنه بيبقى في أضعف حالاته، يفضل تسريحه بعد تنشيفه كويس.
4. اتبع نظام غذائي غني بالبروتينات: لأنها المكون الأساسي لكل أنسجة الجسم خاصة الشعر، من أفضل مصادر البروتين اللبن والبيض والسمك. كمان الأطعمة الغنية بأوميجا-3 مفيدة لصحة الشعر زي الأسماك والسلمون والتونة.
5. كل الأطعمة الغنية بالفيتامينات: خاصة الكالسيوم والحديد والماغنسيوم والزنك فهي أساسية لصحة الشعر، الفيتامينات دي هتلاقيها اكتر حاجة في الخضروات.
6. استشير دكتور جلدية في حالة التساقط الزايد للشعر: أو لو الموضوع ده بدأ من سن صغير عشان ممكن يكون عندك اختلال في الهرمونات، في الحالة دي الدكتور ممكن يوصف مكملات غذائية لتنظيم عمل الهرمونات. أو ممكن يكون السبب مرض من الأمراض اللي ذكرناها وعلاجها هيوقف تساقط الشعر. هتلاقي دكاترة جلدية مناسبة ليك على موقعنا.
7. بطل العادات السيئة زي التدخين وشرب الكحوليات: لأن التدخين بيقلل وصول الدورة الدموية لفروة الرأس وبالتالي بيأثر على نمو الشعر وممكن يزود التساقط. وكمان الكحوليات بتأثر على الجهاز المناعي اللي بيحفز تساقط الشعر أكتر.
8. اشرب كمية كافية من المياه: لأن المياه مهمة جداً لنمو أنسجة الجسم، والشعراية نفسها معظمها عبارة عن مياه.عشان كده على الأقل لازم تشرب 8 اكواب مياه كل يوم.
9. استخدم الثوم وزيت الجرجير وزيت الخروع على الشعر لأنه ثبت فعاليتهم في منع تساقط الشعر وتقويته.
10. دلك فروة الرأس بالزيوت الأساسية: زي زيت اللافندر وزيت الروزماري اللي بيحفزوا بصيلات الشعر على النمو وإنتاج شعر جديد. ممكن تستخدم الزيوت دي مع زيت الزيتون أو زيت اللوز أو زيت جوز الهند وتدلك بيهم فروة الراس كويس (الستات ممكن تلبس بونيه حراري لمدة ساعة) وبعدها اغسل شعرك بالشامبو. وتكرر الوصفة دي كل اسبوع.

لو حسيت ان شعرك بيقع زيادة عن الطبيعى وبدأ يخف او ظهرت مناطق الشعر فيها خفيف فى فروة الرأس، احجز دلوقتى عند دكتور جلدية من على موقعنا:

References: 

https://www.webmd.com/skin-problems-and-treatments/hair-loss/understanding-hair-loss-treatment

https://www.webmd.com/skin-problems-and-treatments/hair-loss/understanding-hair-loss-basics#1

https://www.onegoodthingbyjillee.com/10-simple-remedies-for-hair-loss