8 اعراض للانيميا عند الاطفال واهم 5 حاجات تعمليها عشان تحمي طفلك من الانيميا

الأنيميا أو فقر الدم بيحصل لما بيكون مستوي خلايا الدم الحمراء السليمة في الجسم اقل من المعدل الطبيعي لعمر الطفل و دا بيعمل لمشاكل صحيه كبيره لان خلايا الدم الحمراء دي بتحتوي علي الهيموجلوبين اللي بيوصل الأكسجين لأنسجة الجسم.
طفلك ممكن يكون مصاب بالأنيميا لو :

• جسمه مابينتجش خلايا الدم الحمراء بشكل كافي. ودا بيحصل لو الجسم فيه نقص للحديد أوالعناصر الغذائية المتوافرة في النظام الغذائي.
• الجسم بيدمر خلايا الدم الحمراء كتير. وده بيحصل لو الطفل مصاب بمرض معين أو مرض وراثي بيعمل اضطراب في خلايا الدم الحمراء. (زي فقر الدم المنجلي)
• الجسم بيفقد خلايا الدم الحمراء من خلال النزيف ودا بيكون من خلال نزيف واضح أو النزيف في البراز.

علامات أو أعراض الأنيميا الشائعة

1. البشرة لونها بيبقي فاتح جدا أو رمادي وبيكون في بهتان واضح في منطقه الجفون والأظافر.
2. التهيج في بعض المناطق في الجسم
3. الإحساس بضعف خفيف على غير المعتاد
4. التعب بسهوله من أي مجهود كان سهل قبل كدا
5. لو الأنيميا بسبب تدمير خلايا الدم الحمراء بنلاحظ اصفرار الجلد والعين (يرقان - Jaundice)

أما الأطفال المصابين بالأنيميا الحادة بيظهر عليهم أعراض إضافية زي:

1. ضيق في التنفس
2. سرعه ضربات القلب
3. تورم اليدين والقدمين

الأطفال اللي بيعانوا من الأنيميا الناتجة عن نقص الحديد ممكن تلاقيهم بياكلوا حاجات غريبه زي الثلج والطين ونشا الذرة ودا سلوك مرتبط بالأنيميا اسمه (بيكا) ودا مش ضار إلا لو الطفل كل شيء سام زي أشياء بتحتوي علي ماده الرصاص وسلوك البيكا بيتوقف بعد علاج الأنيميا ومع كبر سن الطفل.

لو طفلك عنده أي من الأعراض أو العلامات دي لازم تستشيري دكتور أطفال، لان اقل درجات الأنيميا ممكن تأثر على طاقة طفلك وتركيزه وقدرته على التعلم وممكن الأنيميا الناتجة عن نقص مستويات الحديد تعمل ضعف دائم في النمو على المدي الطويل.

إزاي احمي طفلي من الإصابة بالأنيميا؟

ممكن نحمي الطفل من الإصابة بالأنيميا الناتجة عن نقص مستويات الحديد أو أنيميا فقر الدم الغذائي من إننا نتأكد إن الطفل بيتبع نظام غذائي متوازن ودا بيكون من خلال استشاره دكتور اطفال والاتفاق على نظام غذائي وتحديد إذا كان الطفل هيحتاج لمكملات غذائية أو لا.

طب إزاي نمنع الأنيميا الغذائية (فقر الدم الغذائي)؟

متشربش طفلك لبن بقري قبل مايبقي عنده 12 شهر لأنه ممكن يسبب فقدان الدم في البراز وبيقلل كميه الحديد اللي بتمتصها الأمعاء.

التغذية في الشهور الأولي:

• لو بتغذي طفلك من خلال الرضاعة الطبيعية فالطفل بيحصل على كميه مناسبة من الحديد لحد عمر 4 شهور على الأقل، بعد الفترة دي لو الطفل لسه بيرضع مع تناول الأغذية الصلبة لازم نخلي بالنا من الأطعمة الغنية بالحديد ودكتور الاطفال هو أفضل شخص ممكن يساعدك في اختيار الأطعمة دي.
• لو بتغذي طفلك من خلال اللبن الصناعي (formula) فلازم تختاري اللبن اللي بيحتوي على إضافات الحديد لان نقص الحديد ممكن يؤدي إلى أنيميا نقص الحديد.

• متخليش أطفالك الأكبر سنا يشربوا اكتر من كوبين من اللبن البقري يوميا لأنه بيعمل إحساس بالشبع واللي بيخلي الطفل يستغني عن باقي الأطعمة اللي بتمده بالحديد.
• الأطفال الأكبر سنا لازم يكونوا بياكلوا طعام صحي وبيتبعوا نظام غذائي سليم ومتوازن وخصوصا الأطعمة اللي فيها حديد زي معظم الحبوب وحبوب الطعام (كورن فليكس) واللحوم الحمراء وصفار البيض والبطاطس والطماطم والفول والزبيب.
• لازم تشجع جميع أفراد العيلة على شرب الليمون أو تناول الأطعمة الغنية بفيتامين C لأنه بيزود من نسبه امتصاص الجسم للحديد.

أما بالنسبة للأطفال اللي بيعانوا من الأنيميا بسبب اضطرابات خلايا الدم الموروثة فلازم المتابعة مع دكتور أمراض دم بالتنسيق مع دكتور الأطفال عشان يقدروا يوفروا الدعم و الرعاية الطبية اللازمة لحاله الطفل.

لو قلقانة ان طفلك عنده أنيميا أو شايفة شوية من اعراض الانيميا وحابة تتطمني على صحته تقدري تحجزي عند دكتور اطفال من على موقعنا:

References:

• https://www.healthychildren.org/English/health-issues/conditions/chronic/Pages/Anemia-and-Your-Child.aspx
• https://kidshealth.org/en/parents/anemia.html
• https://emedicine.medscape.com/article/954506-overview