7 طرق ممكن تقلل من اصابتك بمرض سرطان الرئة  

سرطان الرئة اكتر انواع السرطان اللى بتسبب الوفاة، عدد الوفيات بسبب سرطان الرئة اكثر من عدد الوفيات بسبب سرطان الثدى وسرطان القولون وسرطان البروستاتا وسرطان المبيض مجتمعة.

السبب الأساسى المسبب لسرطان الرئة معروف ونسبة كبيرة جدا من البشر بتعمله ، وهو التدخين. أى شخص ممكن يصاب بسرطان الرئة، لكن 90% من حالات الاصابة سببها التدخين.

نصايح ممكن تقلل من اصابتك بسرطان الرئة:

1. الشاى الأخضر
   الشاى الاخضر ممكن يمنع بعض الضرر اللى بيسببه التدخين فى الخلايا، والاشخاص اللى بيشربوا شاى اخضر بتكون احتمالية اصابتهم بمرض سرطان الرئة أقل. لكن خلى بالك ان الشاى الأخضر مش هو مفتاح حمايتك من سرطان الرئة لو بتدخن .. كفاية تدخين.
2. التنويع فى أكل الخضار والفاكهة
   اتباع نظام غذائى صحى يحتوى على خضار وفاكهة بشكل متنوع بيقلل من خطر الاصابة بسرطان الرئة. الدراسات تشير الى أن التنوع أهم من الكمية الكبيرة، يعنى أكل أنواع مختلفة من الخضار والفاكهة بألوان مختلفة خاصة الخضار او الفاكهة اللى الوانها قوية زى السبانخ والجرجير والتفاح والطماطم والبرتقال.
3. الرياضة
   ممارسة الرياضة بتساعد فى الحماية من سرطان الرئة. وفيه دراسات أثبتت أنه ممارسة رياضة بسيطة زى المشى مرتين فى الاسبوع بتقلل من احتمالية الاصابة بسرطان الرئة.
4. توقف عن التدخين واكشف فوراً
   التدخين مسئول عن 90% تقريباً من حالات سرطان الرئة. الوقت دايما مناسب للتوقف عن التدخين حتى لو بتدخن من 10 سنين او اكتر، معظم المدخنين اللى تم تشخيصهم بمرض سرطان الرئة بتكون فرصهم للنجاة أعلى بكتير لما يوقفوا تدخين.
5. ابعد عن التدخين السلبى
   ابعد عن الاماكن اللى فيها مدخنين، لان دخان السجائر اللى بتتنفسه حتى لو انت مش بتدخن فيه نفس المواد المسرطنة اللى بتسبب السرطان.
6. احترس من غاز الرادون
   الرادون غاز مشع عديم اللون والرائحة بينتج من تحلل عنصر اليورانيوم الطبيعى الموجود فى تربة الأرض. بيكون موجود فى بنسبة أكبر من العادى فى الأماكن المقفولة القريبة من الأرض زى السراديب والشقق اللى فى الدور الأرضى لو تهويتها ضعيفة، وبيتسرب من بين الشقوق والفتحات الأرضية والموجودة فى الكتل الخرسانية للمبانى. والدراسات أثبتت أنه غاز الرادون تانى مسبب من مسببات سرطان الرئة بعد التدخين.
7. خد بالك من ظروف عملك
   لو بتشتغل فى مصنع أو معامل فيها أبخرة ومواد كيميائية، خد بالك من احتياطات الأمن والسلامة عشان تحمى نفسك من المواد الخطيرة اللى ممكن تتنفسها وتسبب سرطان الرئة.
   المصانع وأصحاب الأعمال لازم يكون عليهم رقابة مشددة فى تطبيق احتياطات السلامة لحماية العاملين.
   

ولو حاسس بحاجة من اعراض سرطان الرئة احجز عند دكتور صدر وجهاز تنفسي من على موقعنا واللي هيساعدوك تتطمن على نفسك:

References:

• https://www.verywellhealth.com/tips-for-lung-cancer-prevention-2249286
• https://www.cancer.org/cancer/lung-cancer/prevention-and-early-detection/prevention.html