6 أسباب لسقوط الحمل و7طرق مثبتة علميا وطبيعية تحافظي بيها على حملك  

سقوط الحمل علمياً هو الإجهاض التلقائي للجنين غالباً  قبل الأسبوع الـ20 من الحمل، قليل جداً لما بيحصل بعد الأسبوع ال20 وبيتسمى وقتها بالسقوط المتأخر للحمل. معظم حالات فشل وسقوط الحمل بيكون نتيجة لخلل جيني مميت في الجنين ملهوش علاقة بالأم، لكن في أسباب تانية ممكن تؤدي لسقوط الجنين منها: 

1. تشوهات جينية للجنين: ودي من أكتر المشاكل اللي بتأدي لسقوط الحمل أو الإجهاض، نتيجة لتشوهات في جينات البويضة أو الحيوان المنوي أثناء مرحلة النمو. على الرغم من ان بعض الجينات الغير طبيعية بتكمل في الحمل عادي والطفل بيتولد زي حالة أطفال 'داون'، إلا ان بعض التشوهات بتأدي لتوقف نمو الجنين أثناء فترة الحمل. غالباً التشوهات الجنينة بتحصل للستات اللي فوق 35 سنة لأنهم كل ما بيكبروا في العمر البويضات عندهم بتشيخ.
2. أمراض الغدة الدرقية: سواء قصور أو نشاط زائد في الغدة الدرقية واللي ممكن تعمل مشاكل في الخصوبة أو تسبب إجهاض متكرر. لان فرط نشاط الغدة الدرقية بيتعارض مع قدرة هرمون الاستروجين على القيام بوظايفه وبيخلي الرحم مش قادر على اتمام الحنين. وفي حالة قصور الغدة الدرقية الجسم بيحاول يعوض ده عن طريق زيادة افراز بعض الهرمونات اللي بتقلل حدوث التبويض.
3. مرض السكر: اللي بيكون معتمد في علاجه على الانسولين لو مقدرناش نسيطر عليه واتظبطت نسبة السكر ونسبة الانسولين في الدم خلال ال3 شهور الأولى للحمل بيزيد خطر الاجهاض المتكرر او لو الحمل كمل ممكن يحصل تشوهات في الجنين. عشان كده لو الست عندها سكر لازم تتابع أول بأول مع الدكتور عشان تظبطه قبل وخلال الحمل لتجنب أي مضاعفات.
4. التدخين أثناء الحمل بيزود فرص الاجهاض سواء في الشهور الأولى أو الأخيرة للحمل. عشان كده لازم نتجنب التدخين تماماً أثناء الحمل، لأنه لو مسببش اجهاض فممكن يسبب تشوهات جينية للجنين.
5. المشاكل الجسدية الصحية: زي تشوهات عنق الرحم أو تشوهات في قناة مجرى البول، برغم انها مش أسباب بتتكرر كتير الا انها ممكن تسبب الاجهاض.
6. مشاكل تجلط الدم: من الأسباب نادرة الحدوث واللي بتسبب الاجهاد.

منقدرش دايماً نمنع سقوط الحمل لأنه مش دايماً مرتبط بمشاكل نفسية أو صحية للأم، لكن زي ما قلنا انه غالباً بيكون نتيجة لتغيرات جينية ملهاش علاج بعد الحمل ما يحصل، من الطرق طبيعية اللى هتساعدك تحافظى على الحمل من السقوط:

1. مارسى الرياضة الخفيفة لتحسين صحة الجسم والجنين.
2. حافظى على وزن جسم صحي قبل وخلال وبعد الحمل.
3. ابعدى عن مصادر العدوى عن طريق الحفاظ على الإيدين نضيفة قبل الأكل وغسل الخضروات كويس والبعد عن الأشخاص اللي عندهم أمراض معدية.
4. قللى كمية الكافيين اللي بتشربيها في اليوم بحيث متكونش أكتر من 200 ملليجرام في اليوم.
5. الأكل الصحي المتوازن الغني بالخضروات والفواكه والألياف.
6. خدى مكملات غذائية فيها فيتامينات تحت إشراف دكتور نساء وتوليد عشان تحسنى صحتك وصحة الجنين وتاخدي الفيتامينات اللي انت محتاجها في حملك.
7. ابعدى عن التدخين والتدخين السلبى.

لو ناوية تحملي او حامل احجزى عند دكتور نساء وتوليد من على موقعنا عشان تتابعى معاه وتطمنى على صحتك وعلى صحة جنينك طول فترة الحمل.

 References:

https://www.healthline.com/health/miscarriage#prevention

https://www.parents.com/pregnancy/complications/miscarriage/top-7-causes-of-miscarriage/