6 اعراض للأزمة القلبية و9 طرق للوقايه منها

يعني ايه ازمة قلبية؟

الازمة القلبية: عبارة عن نقص او عدم وصول  الدم اللي بيغذي عضلة القلب نتيجة  جلطة ، ولابد من التدخل السريع عشان ممكن جزء من عضلة القلب يموت نتيجة نقص التغذية.

اعراض الازمة القلبية:

• وجع في منتصف الصدر: يستمر لمدة دقائق و ممكن يذهب لوحده،المريض بيوصف الوجع زي ما يكون حاجةبتعصره او طابقة(ضغطه) علي صدره.
• مناطق اخري للوجع: ممكن المريض يحس بالم في المنطقة اللي تحت عظمة القص(منطقة المعدة)،ارجوكم بلاش تقولوا انها الم في المعدة و التوجه بسرعة للطبيب.او ممكن يكون الوجع في الدراع او الضهر او حتي الرقبة.
• ضيق التنفس: ممكن يكون مع الوجع او يكون لوحده.
• توهان و دوخة.
• غثيان او ترجيع.
• عرقان بس سقعان.

الوقاية من الازمة القلبيه:

لو كنت او كنتي من عيلة ليها تاريخ مع امراض القلب و الشرايين او لأ خلوا بالكم من النصايح دي:

1. التقليل من الضغط العصبي و القلق الشديد: يمكن التغلب عليهم عن طريق تمارين التأمل او العلاج المعرفي السلوكي.
2. نظام اكل صحي: غني بالخضار و الفواكه والبروتين و الدهون الجيدة زي اللي في المكسرات و الافوكادو و اللب السوري و لب الابيض و الابتعاد عن الدهون الضارة زي الاكل السريع و المقليات و في حاجة لازم تخلوا بالكم منها السمنة الصناعي دي خطر جدا جدا ممكن تلقيها في الحلويات و الاكل السريع او ممكن تكونوا بتتطبخوا بيها.
3. ممارسة  الرياضة : لو حافظتوا عليها بانتظام بتقلل العصبية  وكمان كويسة للقلب و شرايين الجسم كله.
4. الاقلاع عن التدخين: لو وانت مدخن تبطل التدخين عالطول عشان صحتك الموضوع محتاج عزيمة مش اكتر،و ممكن تطلب مساعدة الاطباء،اما لو انت مش مدخن فخلي بالك من التدخين السلبي بياثر علي الصحة جامد.
5. قياس ضغط الدم بانتظام: ارتفاع ضغط الدم مالوش اعراض في معظم المصابين بيه و ممكن يعمل ازمة قلبية او سكتة دماغية عشان كده اسمه القاتل الصامت ده لو انت او انتي مش مريضة بالضغط ،اما مريض الضغط ياخد العلاج باستمرار
6. قياس نسبة السكر في الدم بانتظام: مهم قياس السكر كل فترة،التشخيص المبكر بيمنع مشاكل السكر او مضاعفاته ،اما مريض السكر يلتزم ب العلاج و الاكل الصحي و ممارسة الرياضة المناسبة لسنه.
7. قياس دهون الدم: قياس دهون الدم كل 6 شهور لو  معندكش مشكلة في دهون في الدم اما اللي عنده ارتفاع دهون الدم لازم يشوف الدكتور المتخصص.
8. الابتعاد عن العزلة و علاج  الاكتئاب: سبب لا يمكن نسيانه و ممكن علاجهم من خلال العلاج السلوكي المعرفي و ممارسة انشطة جديدة.
9. المحافظة علي وزن مثالي: تعرفوا ازاي ان وزنكم كويس ولا لأ ، عن طريق مؤشر كتلة الجسم اللي بيساوي الوزن ب (كجم)علي الطول في نفسه ب( المتر)، مثال شخص طوله 170 سم و وزنه 70 كيلو لتحويل الطول للمتر نقسم علي 100 يعني 170\100 بتساوي 1.7 متر.مؤشر كتلة جسمه هيكون 70 \1.7x1.7=24.2 ،الوزن المناسب بيكون من( 18.5 لغاية24.9)، تحت 18.5 =نحافة ، من 25 -29.9=وزن زايد،30 فما فوق سمنة.المعادلة ده بتحسب الوزن للبالغين يعني متنفعش للاطفال و المراهقين.

لو شاكك ان عندك مشاكل في القلب وحابب تتطمن على صحتك تقدر تحجز عند دكتور قلب من خلال موقعنا.

https://www.cdc.gov/heartdisease/heart_attack.htm
https://www.heart.org/en/health-topics/heart-attack/warning-signs-of-a-heart-attack
https://www.cdc.gov/healthyweight/assessing/bmi/adult_bmi/index.html