5 علامات تبين إن زيادة وزنك خطر على صحتك

زيادة الوزن مش بس هتحدد خياراتك في اللبس، لكن الأهم من كده إنها هتمثل خطورة على صحتك وتعرضك للإصابة بأمراض كتيرة زي السكر وأمراض القلب وهتأثر على الحامل وجنينها سواء على المدى القريب أو البعيد.

في 5 نقط هنتكلم عن علامات تنبهك إنك مُعرض للخطر ولازم تقلل وزنك:

1- الدهون حول الوسط: لو عندك دهون زيادة حول الوسط فده بيزود إحتمالية إصابتك بأمراض القلب وإرتفاع الضغط وزيادة نسبة الكوليستيرول في الدم، كمان بيزود مقاومة خلايا الجسم للإنسلوين فبالتالي تزيد إحتمالية الإصابة بمرض السكر من النوع التاني.

2-أكل السكريات كتير:لو بتاكل سكريات كتير فهتكون عرضة أكتر من غيرك للإصابة بمرض السكر، لإن البنكرياس بيفرز إنسولين أكتر من الطبيعي وده بيخليه يفشل بعد كده في إفراز المعدل الطبيعي للإنسولين، فيزيد السكر في الدم،وبالتالي يتطور للإصابة بمرض السكر.

3-تكيس المبايض: النساء اللي عندهم تكيس مبايض لو وزنهم زيادة بيبقوا معرضين أكتر من غيرهم للإصابة بالسكر، عشان كده لو عندِك تكيس مبايض والدورة الشهرية مجتش منتظمة ارجعي للطبيب.

4-معندكش طاقة وحاسس بخمول أغلب الوقت: من الأسباب الطبية المهمة في زياده الوزن ممكن تكون الغده الدرقية. لإن في حالات قصور الغده الدرقية، الغده الدرقية مبتفرزش الهرمون بشكل كافي وبالتالي بتسبب زيادة الوزن و إرتفاع نسب الكوليسترول.
لو وزنك زيادة وحاسس بخمول أغلب الوقت؛ تحليل الغدة الدرقية هيكون مفيد عشان تطمئن على نفسك.

5-إلتهاب المفاصل: المصابين بإلتهاب المفاصل أعراضهم بتزداد سوء مع زيادة الوزن،وممكن زيادة الوزن نفسها تطور الإصابة بإلتهاب المفاصل؛عشان كده بننصح بمحاولة فقدان الوزن.

إزاي تفقد الوزن بطرق طبيعية:

مع إن في طرق كتير يُقال إنها بتساعد على فقد الوزن، لكنها للإسف مش مبنية على أسس علمية، ومش بيحصل بيها فقد للوزن بتبقا تضييع وقت وجهد وأحيانًا تضييع فلوس كمان.
لكن في طرق طبيعية مبنية على أسس علمية بتقلل الوزن ودي اللي هنتكلم عنها:

• الصيام المتقطع: عبارة عن نظام بيتكون من صيام لفترات قصيرة منتظمة وأكل في فترات قصيرة في اليوم، لمدة 24 إسبوع بيقلل الوزن.
• مارس الرياضة وتتبع نظامك الغذائي بإنك تكون على دراية بكل اللي بتاكله أوتشربه كل يوم بمعنى إنك تسجل وتتابع نفسك.
• الإهتمام بكيفية ومكان الأكل: التركيز على الأكل الصحي المغذي،والأكل ببطئ بعيد عن التلفزيون والتليفون للتركيز في كمية الأكل.
• أكل بروتين في الفطار: بينظم الشهية وبيحسس بالامتلاء، بروتين زي:البيض ، الشوفان ، زبدة الفول السوداني، الكينوا ، السردين ، بذور شيا.
• تقليل السكريات والكربوهيدريت واستبدالهم ب: الطعام المعمول من قمح كامل زي الرز والمكرونة والعيش بدل من نسخهم اللي بالدقيق الأبيض.
  الفواكه والمكسرات بدل من المقرمشات المحتوية على سكر عالي
  الشاي والأعشاب بدل المشروبات الغازية
• أكل ألياف بيشعر بالأمتلاء فتقلل كمية أكلك زي العيش بالردة أو الفواكه والخضروات والفول والمكسرات
• المحافظة على توازن البكتيريا النافعة في الجهاز الهضمي
• المحافظة على اخد قسط كافي من النوم ليلا
• البعد عن الضغوطات والإسترخاء
  
  

من المهم إنك تعرف إن تقليل الوزن هياخد وقت وإن النصايح دي بشكل عام لكن كل شخص بيحتاج نظام مختلف مناسب ليه لو تابعت مع دكتور متخصص هتلاقي النتيجة ناجحة في أسرع وقت وإن الوزن الزائد مش بس مشكلته في الشكل والثقة بالنفس لكن كمان هيبقا خطر على الصحة وده الأهم.
لو بتعاني من زيادة في الوزن وعايز تعالجها او حابب إنك تتطمن على النظام الغذائي بتاعك تقدر تحجز عند دكتور تخسيس وتغذية من على موقعنا

:refrances
https://www.medicalnewstoday.com/articles/322345.php
https://www.thehealthy.com/weight-loss/weight-gain-health-trouble/