16 سبب لتأخر الحمل و13 طريقة طبيعية تسرعي بيهم الحمل 

أحياناً بتعاني من تأخر في حدوث الحمل مع ان مفيش أي حاجة ظاهرياً تمنع حدوثه، إلا ان ده ممكن يكون لأسباب مرضية أو فسيولوجية غير واضحة وده مش بيبان إلا بعد الكشف.

أسباب تأخر الحمل

1. اضطراب في الهرمونات الأنثوية: الهرمونات هي اللي بنتظم دورة التبويض عندك، وعشان كدة لو اختلت سواء بالزيادة أو بالنقصان هيأثر على عملية التبويض وبالتالي هيبقى في مشاكل في الحمل.
2. انسداد قناة فالوب: قناة فالوب هي اللي بتنقل البويضة الناضحة أو البويضة المتخصبة للرحم، فلو حصل انسداد فيها بسبب أي أمراض أو بسبب تدخل جراحي هيمنع وصول البويضة للرحم وبالتالي مش هيحصل حمل.
3. تكيس المبيضين: بيحصل نتيجة خلل هرموني بينتج عنه زيادة الهرمونات الذكرية (التستوستيرون) وبالتالي هيحصل اضطرابات في الهرمونات المسئولة عن الحمل.
4. الأورام الليفية: دي خلايا حميدة بتصيب الرحم و بينتج عنها زيادة في عدد خلايا الورم بشكل يأثر على الحمل. الورم الليفي يعتبر من أكبر مشكلات الخصوبة عند الستات لكنه بيتعالج بعملية جراحية لإزالته وبعد فترة العلاج بيحصل حمل عادي.
5. انسداد عنق الرحم: بيحصل بسبب قلة إفرازات الرحم، الإفرازات دي هي اللي بتساعد الحيوانات المنوية انها توصل للبويضه.
6. النمو الغير طبيعي للبويضة: بيحصل عند بعض السيدات نمو البويضة بشكل غير سليم وبالتالي مبتكونش قادرة على تكوين جنين.
7. خلل في الجسم الأصفر: الجسم الأصفر عبارة عن مرحلة من مراحل تكوين البويضة، لو حصل خلل أثناء تكوينه بينتج بويضة مينفعش تتخصب وبالتالي مبيكتملش الحمل.
8. نمط الحياة غير الصحي: زي التلوث البيئي والكيماويات اللي بتأثر على مستوى الهرمونات وبالتالي بيحصل اضطراب في دورة الحمل. ده غير التدخين والكحوليات اللي بيسببوا اضطراب للهرمونات، وممكن في بعض الحالات الشديدة توصل لتشوهات للأجنة.
9. العيوب الخلقية للرحم زي الالتصاقات.
10. بعض الأمراض: زي مرض السكر ومرض قصور الغدة الدرقية.
11. الضغط العصبي والتوتر الزايد والمشاكل النفسية.
12. الوزن الزايد أو الوزن أقل من الطبيعي.
13. قلة الخصوبة عند الرجل: بسبب عدم جودة السائل المنوي أو ضعف الحيوانات المنوية وقلة عددها.
14. ضعف القدرة الجنسية للرجل بسبب أمراض زي السكر وارتفاع ضغط الدم.
15. سرعة القذف عند الرجال: بتأدي لعدم وصول الحيوانات المنوية للمهبل.
16. العيوب الخلقية في الجهاز التناسلي للرجل: زي العيوب الخلقية في قناة مجرى البول، وده بيمنع وصول الحيوانات المنوية للمهبل.

وسائل طبيعية تسرعي بيهم الحمل

فيه لوسائل طبيعية ممكن تقدرى بيهم تسرعي حدوث الحمل. النظام الغذائى ونمط الحياة الصحى ممكن يحفز عملية التخصيب بنسبة 69% .

1. كلى الاطعمة الغنية بمضادات الأكسدة زى الخضروات والمكسرات، مضادات الأكسدة بتحفز الخصوبة عند الرجال والسيدات وبتسهل عملية الاخصاب 
2. ابعدى عن الاكلات اللى فيها دهون متحولة لان الدهون المتحولة بتزود احتمالية ضعف الخصوبة، الدهون المتحولة موجودة فى الزيوت النباتية اللى بنستخدمها للتحمير وفى بعض المخبوزات.
3. كلى الاطعمة اللى فيها ألياف زى الخضروات. الالياف بتساعد على الجسم على التخلص من الهرمونات الزيادة وبتحافظ على توازن السكر فى الدم.
4. كلى كمية أكبر من البروتين النباتى (الحبوب والمكسرات والبقوليات) بدل البروتين الحيوانى ( اللحوم الحمراء والفراخ والبيض) . الدراسات اثبتت ان البروتين النباتى بيقلل خطر ضعف الخصوبة بنسبة ممكن توصل لـ 50%
5. اعتمدى على منتجات الالبان كاملة الدسم بدل منتجات الالبان قليلة الدسم  
6. راقبي معاد الدورة الشهرية واعملي جدول بأيام التبويض لأن دي أكتر أيام الخصوبة واللي بتزيد فيها نسبة الحمل. غالباً وقت التبويض بيبقى بعد انتهاء الدورة الشهرية بحوالي 6 أيام، لكن ده مش معاد ثابت لكل الستات.
7. وقفى التدخين لو بتدخنى لانه  بيأثر على الهرمونات و على تكوين الجنين.
8. اتستشيري دكتور اذا ممكن تاخدي مكملات غذائية. الدراسات اثبتت انه المكملات الغذائية ممكن تقلل احتمالية ضعف الخصوبة بنسبة 41%.
9. خلي بالك من وزنك عشان ميزيدش عن الوزن الطبيعي، لأن السمنة المفرطة بتسبب إفراط في إفراز بعض الهرمونات وده بيعمل اضطراب في عملية التبويض والدورة الشهرية وبالتالي بيقلل حدوث الحمل.
10.  العبى رياضة. الدراسات اثبتت انه ممارسة الرياضة بشكل منتظم ولو لمدة ساعة واحدة فى الاسبوع بيقلل احتمالية ضعف الخصوبة بمعدل 5%.
11.  قللى من الكافيين اللي فى القهوة والشاى والنسكافيه لأن الكافيين الزيادة قبل الحمل ممكن يسبب الاجهاض.
12. ابعدوا عن البيئة الملوثة والكيماويات لأنها ممكن تقلل خصوبة الراجل وتأثر على خصوبة الست عن طريق اضطراب وظائف المبيض واضطراب الدورة الشهرية.
13. ابعدى عن  التوتر والضغوط النفسية والعصبية لأنها بتسبب عدم انتظام الهرمونات وممكن تزود احتمالية ضعف الخصوبة.

لو عندك مشاكل او تأخر فى الحمل وعايزة تطمنى احجزى دلوقتى عند دكتور نساء وتوليد من على موقعنا:

References:

• https://www.healthline.com/nutrition/17-fertility-tips-to-get-pregnant#section17
• https://www.webmd.com/infertility-and-reproduction/guide/understanding-infertility-symptoms