14 نصيحة سهلة لحمايتك من الإكتئاب.

فيه فرق بين الاكتئاب كمرض والحالات المزاجية السيئة ، لكن الحالات المزاجية السيئة المستمرة علامة مهمة من علامات الاكتئاب. فيه عادات يومية بسيطة بتساعد فى ان المزاج يتحسن وبتحمى من الاصابة بالاكتئاب على المدى البعيد.

اهم العادات اللي بتحمي من الاكتئاب:

1. نام كويس بالليل
   النوم بيأثر على كل حياتنا بشكل مباشر، مش بس بيدينا طاقة عشان نقدر نكمل لليوم اللى جاى، لكنه كمان مرتبط بكيمياء الجسم. قلة النوم بتسبب ضغط عصبى وارهاق، وعلى المدى الطويل بتسبب مشاكل نفسية وجسدية انت فى غنى عنها. عشان كدة الأبحاث بتقول انه لازم تنام على الأقل 7 ساعات نوم هادئ بالليل.
2. العب رياضة بانتظام
   الرياضة من أحسن الحاجات اللى ممكن تعملها عشان تحسن نفسيتك، وتعتبر علاج ووقاية فى نفس الوقت من الاكتئاب لأن ليها تأثير مهدئ على الجهاز العصبى و بتحفز الجسم لافراز الاندروفين اللى بيحسن المزاج.
   كل الانشطة الرياضية ليها نفس التأثير، اختار رياضتك اللى بتحبها بس المهم تمارسها بانتظام.
3. قلل من استخدام السوشيال ميديا
   اثبتت الدراسات ان مواقع السوشيال ميديا ممكن جدا تتحول لإدمان، وانها ممكن تسبب اكتئاب وبتقلل من احترام الانسان لذاته و رضاه عنها. حاول تخرج من كل مواقع السوشيال الميديا ومتدخلش أكتر من مرة واحدة فى اليوم ولهدف معين.
4. ابنى علاقات قوية
   وجود حياة اجتماعية نشيطة مهم عشان صحتك النفسية، الاقارب والاصدقاء بيكونوا دعم كويس فى مواقف الحياة الصعبة. حافظ على علاقاتك الاجتماعية رغم مشاغل الحياة.
5. قلل اختياراتك اليومية
   الاختيارات اليومية البسيطة زى هناكل ايه النهاردة ، وهلبس ايه بكرة بتستهلك من طاقتنا وبتسبب لينا ضغط ممكن يتراكم. وحياتنا مليانة اختيارات ممكن تدخلنا فى دوامة من الشك والخوف من الاختيار الخطأ. حاول تقلل من اختياراتك (مثلا حدد الحاجات اللى هتشتريها من السوبر ماركت بالظبط عشان متحترش بين المنتجات) ومتفكرش كتير فى القرارات اليومية البسيطة.
6. قلل الضغط العصبى
   اتعلم ازاى تتعامل مع الضغط العصبى لانه سبب شائع لمرض الاكتئاب. اتجنب العصبية وحاول تتأمل وتفضى دماغك من وقت للتانى واعرف ازاى تتخلى عن الحاجات اللى متقدرش تسيطر عليها.
7. متلومش نفسك كتير
   لوم النفس الشديد بيعرضك للاكتئاب. كلمات زى "كان المفروض اعمل كذا" مش بتحل حاجة، دى بتسبب نتيجة عكسية. فيه فرق بين تحمل مسئولية قراراتك وبين لوم النفس. خلى عندك القدرة على تقبل الحاجات اللى متقدرش تغيرها وانساها, و ركز بس على الحاجات اللى تقدر تغيرها.
8. ابعد عن الناس "المسممة"
   كنا بنقابل ناس فى حياتنا بيحسسونا اننا مش كويسين ، سواء انهم بيتريقوا علينا, بيرخموا علينا, او بانهم بيقللوا مننا عشان يحسوا انهم احسن. ابعد عن الناس دول فوراً. ابعد كمان عن الناس الاستغلاليين. خد بالك من العلامات ان لو شخص اتكلم عن شخص تانى بشكل مش كويس، غالبا هيعمل كدة معاك.
9. اهتم بالتغذية
   بعض الدراسات وضحت ان استهلاك أكلات دسمة ممكن يكون سبب من اسباب الاكتئاب. اهتم انك تاكل اكل متوازن فيه بروتين وانواع مختلفة من الخضار والفاكهة وتقلل من الدهون والسكريات.
10. حافظ على وزن مناسب
    زيادة الوزن بتسبب قلة تقدير للنفس، خاصة لو بدأت تدخل فى مقارنات مع الآخرين، وهو سبب اساسى من اسباب الاكتئاب. اثبتت الدراسات ان  43% من الناس اللى عندهم اكتئاب عندهم زيادة فى الوزن بالاضافة الى ان الناس اللى عندهم اكتئاب معرضين جداً للزيادة فى الوزن.
11.   الأمراض المزمنة
    الناس اللى بيعانوا من أمراض مزمنة مستمرة معاهم زى السكر او ضغط الدم مثلاً بيكونوا أكتر عرضة للاصابة بمرض الاكتئاب. الامراض المزمنة من الاسباب اللى منقدرش نتحكم فيها لكن عشان تقلل احتمالية الاكتئاب لو بتعانى من مرض مزمن:
    1. اتأكد من الدكتور بتاعك عن وضع حالتك الصحية اول بأول
    2. حافظ على الادوية بتاعتك فى ميعادها واتبع اسلوب حياة صحى ومناسب ليك
12. اقرأ نشرات الادوية باهتمام
    بعض الادوية ممكن تسبب حالة نفسية سيئة او اكتئاب كعرض جانبى ليها، اقرأ النشرة الداخلية اللى بتيجى مع الدواء علشان تعرف اعراضه الجانبية وتتوقعها وتقدر تتعامل معاها، واسأل الدكتور لو فيه دواء مختلف ممكن تاخده ميكونش بيسبب الاكتئاب كعرض جانبى.
13. بطل تدخين
    التدخين والاكتئاب متلازمين دايماً. اى نوع من انواع النيكوتين هو من آثار الاكتئاب فلو بتدخن بطل تدخين. وعشان تبطل تدخين فكر نفسك دايماً بالسبب ورا القرار دة ، انك هتبطل عشان تبعد عنك الاكتئاب وتشد ليك السعادة. وتوقع الاثار الجانبية المؤقتة اللى هتحصلك من التدخين.
14. اتعامل مع مسببات الاكتئاب
    فيه حاجات بتحصل فى الحياة ملناش سيطرة عليها وبتسبب لنا شعور بالضيق او الحزن او الاكتئاب، زى مثلا الذكرى السنوية لوفاة حد عزيز عليك، او انك هتشوف الشخص اللى كنت مرتبط بيه قبل كدة مع حد تانى فى مناسبة اجتماعية. اسهل طريقة عشان الاسباب دى متأثرش عليك بقوة هو انك تحاول تتوقعها قبل ما تحصل بفترة وتطلب من صديق مخلص انه يقف جنبك ويساعدك فى الوقت دة وخليك متأكد انه وقت وهيعدى.

لو شاكك انك داخل على اكتئاب او عندك اكتئاب، احجز بسرعة عند دكتور نفسى عشان متوصلش لمرحلة متقدمة من الاكتئاب.

هتلاقي دكاترة نفسيين متخصصين على موقعنا و هتقدر تعرف 12 علامة تعرفك ان عندك اكتئاب و 10 طرق سهلة تخلصك من الاكتئاب

References:

• https://www.healthline.com/health/how-to-avoid-depression#10
• http://www.health.com/health/gallery/0,,20431660,00.html#stop-blaming-yourself-0
• https://www.powerofpositivity.com/9-ways-prevent-depression-naturally/