12 علامة تعرفك ان عندك اكتئاب و 10 طرق سهلة تخلصك من الاكتئاب

الاكتئاب مرض عادة بيظهر بدون سبب واضح في الحياة العادية لبعض الناس وبيسببلهم توقف في قدرتهم على ممارسة أعمالهم وعلى نظرتهم للحياة بشكل عام فبيحسوا ان معدش في حاجة في الحياة مهمة، والفجوة دي بتفضل تكبر جواهم يوم بعد يوم لحد ما بيبقى صعب حد يوقفها. مريض الاكتئاب مش شرط تظهر عنده كل أعراض المرض، لأن الأعراض بيتختلف من شخص للتاني وكمان بتتوقف على درجة تقدم المرض.

من أهم اعراض الاكتئاب:

1. هتحس بالتشاؤم واللامبالاة وصعوبة الحياة والفشل وعدم الرضى عن النفس، وممكن يوصل لإنك مش شايف أي خير أو أي شيئ كويس في الحياة، وهتشوف المشاكل الصغيرة كأنها عقبات كبيرة مش قادر تتخطاها.
2. هتحس دايماً بالحزن من غير أي سبب واضح.
3. هتحس بالذنب وانعدام القيمة وتأنيب الضمير: برغم ان ناس كتير جداً ممكن يجيلهم الشعور بتأنيب الضمير إلا ان لو عندك اكتئاب هيجيلك الشعور ده بشكل مضاعف ومن غير سبب حقيقي، وهتحس انك مسئول عن عواطف الآخرين وكمان هتحس بالذنب تجاه أحداث عدت ومعدش ليها وجود.
4. هتفقد الاهتمام او الاستمتاع بالهوايات والأنشطة اللي اتعودت تستمتع بيها زمان: وده بيخلي صعب على الأشخاص المحيطين بيك انهم يعرفوا انك مكتئب أو بتعاني من مشكلة وده بسبب انعزالك عنهم.
5. هتحس بالتعب وانعدام الطاقة بدون وجود أسباب عضوية، لدرجة انك ممكن تاخد وقت طويل في عمل حاجة بسيطة رغم انها محتاجة مجهود قليل.
6. هتلاقى صعوبة في التركيز وانت بتعمل حاجة معينة او فى وقت  المذاكرة مثلاً وبتاخد وقت في استرجاع المعلومة وصعوبة في اتخاذ القرارات.
7. هيقى عندك أرق وهتنام  ساعات قليلة، أو هتنام كتير بشكل اكتر من العادى والمعقول.
8. تغير في الشهية، هتاكل كتير ووزنك هيزيد،او هيحصلك فقدان فى الشهية وصعوبة في الأكل وبالتالي وزنك هيقل بشكل ملحوظ.
9. هتتعصب وتتنرفز زيادة على أتفه الأسباب أو من غير أسباب، ناس كتير مبتعرفش ان العصبية الزيادة ممكن تكون مخبية وراها اكتئاب وبيعتبروا ان دي فترة وهتعدي أو عرض جانبي لفترة الطفولة أو المراهقة عشان كدة محدش بيلتفت للسبب ده أو بياخده على محمل الجد.
10.  هيجيلك أفكار انتحارية أو هتحاول تنتحر فعلياً، ودي أخطر علامة من علامات الاكتئاب وبتدل على ان الشخص وصل لمرحلة متقدمة من المرض،هتحس ان حياتك ملهاش فايدة ولا معنى وعشان كدة هتقرر تنهيها لانك حاسس انه كدة مأساتك هتخلص وترتاح. ولو حاسس انك قربت من المرحلة دي لازم تشوف دكتور امراض نفسية فورا.
11.  ممكن تحس بأعراض جسدية زي المغص والصداع وألم في الظهر والعضلات من فترة للتانية من غير اى دليل على أمراض عضوية.
12.  هتحس انه مستحيل تصحى من النوم وتقوم من على السرير، وهتلاقى انه ممكن تقضى ساعات طويلة جداً على السرير خلال اليوم.

لحسن الحظ في طرق ممكن تحمي نفسك بيها من الاكتئاب وتتخلص من إحساس انعدام القيمة أو اللامبالاة. من الطرق دي:

1. اخلق روتين يومي
   عشان متسمحش للاكتئاب يلاقي طريقه من خلال الفوضى والفراغ، النظام اليومي هيخليك على طول مشغول من غير اى فرصة للتفكير في أفكار كئيبة أو هدامة.
2. حط اهداف
   الاكتئاب بيساعد على الخمول وعدم الإنجاز، عشان كده حط أهداف يومية بسيطة لنفسك عشان تحس بالإنجاز والتقدم وبعد كده تقدر تتنقل لأهداف وتحديات أكبر.
3. العب رياضة
   حاول تمارس الرياضة بشكل منتظم لأنها بتساعد على إفراز مادة الاندورفين اللي بتحسن المزاج النفسي وبتساعد المخ على التفكير بشكل إيجابي.
4. كل أكل صحى
   الأكل الصحي له دور في تحسين المزاج زي الأطعمة الغنية بأوميجا-3 (السلمون والتونة) والأطعمة الغنية بحمض الفوليك (السبانخ والأفوكادو) ليهم دور في محاربة الاكتئاب.
5. نام كويس
   الاكتئاب أوقات كتير بيسبب أرق أو النوم لساعات طويلة، عشان تتغلب على كده حاول تنام في نفس المعاد كل يوم وتصحي في نفس المعاد، وبلاش نوم نص اليوم لأنه بيبوظ نظام النوم كله.
6. اتحمل المسئولية
   سواء في الشغل أو في البيت ومتقعدش فاضي ومتسبش نفسك للأفكار السلبية، اشغل نفسك بأي حاجة عشان تحس بالإنجازات.
7. حارب الأفكار السلبية
   لما تكون مكتئب بتلاقي نفسك بتنجرف ناحية الأفكار الهدامة وأسوأ الاحتمالات. حاول تستخدم المنطق فى تفكيرك، يعني ممكن تفكر ان مفيش حد بيحبك، بس هل في دليل على كده؟ أو انك مبتعملش أي حاجة مفيدة في حياتك، بس هل ده فعلاً صحيح؟
8. اعمل حاجة جديدة
   اجبر نفسك تعمل حاجة مختلفة مجربتهاش قبل كدة، روح أماكن جديدة، اتعلم لغة جديدة، غامر واشغل عقلك بأي حاجة. لما بتتحدى نفسك بحاجة جديدة عقلك بيفرز اندروفينات مسئولة عن المتعة  وتعديل المزاج.
9. حاول تستمتع بأي حاجة بتعملها، لو فشلت في كده حاول مرة تانية.
   
10. راجع دكتور نفسي قبل ما تاخد أي أدوية أو علاج للاكتئاب.

لو لاحظت ان عندك اي اعراض الاكتئاب اللى اتكلمنا عنها وحاولت تعمل النصايح دى ومفيش نتيجة ملموسة، احجز بسرعة عند دكتور نفسى عشان متوصلش لمرحلة متقدمة من الاكتئاب.

هتلاقي دكاترة نفسيين متخصصين على موقعنا

References:

https://psychcentral.com/lib/top-10-signs-of-depression/

https://www.msn.com/en-in/health/medical/13-hidden-signs-that-tell-you-are-suffering-from-depression/ar-AAb8Wfj

https://www.webmd.com/depression/features/natural-treatments#2