الكليتين من أهم الأجهزة الحيوية في الجسم اللي غالباً الناس بتنسى دورها الرئيسي في فلترة الدم وتنقيته من المواد الضارة وتنظيم نسبة الأملاح فيه، وعشان كده أمراض الكليتين مش اقل خطورة بالنسبة للجسم عن أمراض القلب أو الكبد مثلاً.
فيه عادات بيعملها الناس وهم مش عارفين تأثيرها وخطورتها على الكليتين، من أهم العادات دي:
- أخذ الاسبرين والمسكنات باستمرار ولفترات طويلة
برغم قدرة وفعالية الأدوية دي على التخلص من الألم إلا أنها على المدى الطويل بتسبب ضرر شديد وتلف للكليتين خاصة لو الشخص بيعاني أصلا من مرض كلوي.
عشان كدة مستخدمش المسكنات كتير من نفسك ولازم تستشير طبيب الأول.
- تناول الأطعمة الغنية بالأملاح كتير
الأطعمة اللى فيها أملاح ليها دور في رفع ضغط الدم واللي بدوره بيأذي الكليتين.
وكبديل للأملاح ممكن تستخدم الأعشاب والتوابل في الأكل.
- الأغذية المعلبة
فيها كميات كبيرة من الصوديوم والفوسفور اللي بينصح الأطباء باالتقليل منه لمرضى الكلي. فيه دراسات بتقول ان استهلاك الفوسفور الموجود في الأغذية المعلبة بيعرض الأشخاص اللي معندهمش أمراض في الكلي لضرر في الكلي والعظم.
عشان كدة أقرأ مكونات علب الأغذية قبل ما تشتريها عشان تعرف نسبة الأملاح والفوسفور فيها، ويفضل بقدر الإمكان انك تبعد عن الأنواع دي من الأكل.
- عدم شرب كمية كافية من المياه
المياه هي اللي بتمكن الكليتين على التخلص من الأملاح الزايدة في الجسم، عشان كده قلة المياه في الجسم بتسبب تراكم الأملاح في الكليتين وعدم قدرتها على الخروج بره الجسم فبالتالي بتضر الكليتين وبسببب تكون حصوات في الكلي.
اشرب مياه كفاية للحفاظ على الكلى. الكمية المثالية للمياه للحفاظ على توازن الأملاح هي 1.5 ل 2 لتر يومياً.
- عدم النوم لفترة كافية
النوم الصحي مفيد للجسم ولكل الأجهزة الحيوية بشكل عام لأنه بيسمح بفترة يستجمع فيها الجسم نشاطه وتوازنه عشان يرجع يشتغل اليوم التالي. وكمان الكبد بينظم وقت عمله على دورة النوم والصحيان على مدار 24 ساعة.
عشان كده لازم تاخد كفايتك من النوم عشان تسمح للجسم يأدي وظايفه على أكمل وجه.
- استهلاك كمية كبيرة من اللحوم في الأكل
البروتين الحيواني بيزود حموضة الدم بشكل مبتقدرش الكلية تنظمه وبالتالي ده بيضر الكلي.
لازم توازن في الأكل بين اللحوم والخضروات عشان تحقق أقصى استفادة للجسم ومن غير ما تضره.
- تناول الأطعمة الغنية بالسكريات كتير
السكريات الكتير بتساعد على السمنة واللي بتزود خطورة ارتفاع ضغط الدم، والسببين دول ليهم دور في مرض الكلي. الحلويات مش هي المصدر الرئيسي للسكر، في أطعمة غير سكرية ولكنها غنية بالسكر زي حبوب الإفطار والخبز الأبيض والفاكهة.
عشان كدة ابعد قدر الامكان عن الأنواع دي من الأطعمة واكتفى بالبديل ليها واللى مش هيضر صحتك.
- التدخين
التدخين معروف بأثره الضار على القلب والرئتين، لكنه كمان مضر بالكليتين، لأنه بيرفع ضغط الدم وبالتالي بيأثر على الكلي سلبياً، وكمان أثبتت الأبحاث وجود بروتينات في بول المدخنين وده دليل على تلف الكلي.
ابعد عن التدخين عشان تحافظ على صحتك.
- الإفراط في شرب الكحوليات
أثبتت الدراسات ان شرب الكحوليات بانتظام (أكتر من 4 مرات في اليوم) بيضاعف خطر الأصابة بأمراض مزمنة في الكلي. وثبت ان الأشخاص المدخنين بجانب إفراطهم في شرب الكحوليات بيزيد عندهم خطر الإصابة بأمراض الكلى المزمنة 5 مرات أكتر من الأشخاص غير المدخنين أو المدمنين على الكحوليات.
- الجلوس والخمول وعدم القيام بأي نشاط بدني لفترات طويلة
بالرغم من عدم وجود أدلة تربط بين الخمول وبين صحة الكلي إلا ان تم إثبات ان القيام بأنشطة بدنية بشكل منتظم بيحسن من ضغط الدم وأيضا الجلوكوز واللي بتعتبر عوامل مهمة لصحة الكلي.
مارس رياضة بشكل منتظم، حتى لو أنشطة بسيطة زى المشى او طلوع السلم بدل استخدام الاسانسير ممكن تكون سبب فى حمايتك من أمراض انت فى غنى عنها.
خلى بالك، لو شاكك ان عندك مشكلة فى الكلى احجز عند دكتور كلى من على موقعنا عشان تطمن على نفسك
References:
https://www.kidney.org/content/10-common-habits-that-may-harm-your-kidneys
https://www.healthiguide.com/health/habits-that-hurt-your-kidneys/
التعليقات
تعليق 0