10 اعراض للحمى و5 طرق بسيطة لعلاجها في البيت

الحمى او ارتفاع درجة الحرارة مش مرض فى حد ذاتها، لكنها عادة بتكون عرض لحالة معينة الجسم مش قادر يتعامل معاها بشكل عادى فبيبدأ الجسم درجة حرارته تتغير كوسيلة دفاعية لمواجهة العناصر الدخيلة عليه، العناصر الدخيلة دى ممكن تكون عدوى فيروسية او بكتيرية او فطريات أو عرض جانبى لبعض أنواع من الأدوية أو أى سموم.

درجة حرارة الجسم الطبيعية هى 37 درجة مئوية لكن طبياً الحمى تعتبر بسيطة طالما درجة الحرارة أقل من 38 درجة مئوية. خاصة ان بعض انواع الحمى بتكون غير مؤذية لأنها بتساعد الجسم على التخلص من أى عدوى تعرض لها. وفى الحالة دى بتكون الراحة هى العلاج الأمثل للحمى من غير أى تدخل دوائى.

لكن بردو بناء على سنك وحالتك الصحية والأسباب الحقيقة المسببة للحمى، ممكن تحتاج استشارة دكتور عشان تقدر تعالج الحمى بشكل سليم وتعالج المرض المسبب ليها.

أعراض الحمى:

1. ارتفاع درجة حرارة الجسم عن 38 درجة مئوية
2. الارتجاف والاحساس بالبرد والقشعريرة 
3. ألم فى العضلات والمفاصل ومعظم اجزاء الجسم
4. الصداع
5. العرق الغزير
6. احساس بالضعف والدوخة 
7. ألم فى العينين 
8. فقدان الشهية للأكل
   
   

فى حالات الحمى الشديدة لو درجة الحرارة زادت عن 40 درجة مئوية ممكن تظهر أعراض اكتر خطورة وفى الحالة دى لازم تستشير دكتور فوراً:

1. تشنجات فى الجسم
2. حالات هلوسة او ارتباك

قياس درجة الحرارة فى البيت: 

فيه نوعين من الترمومترات لقياس درجة حرارة الجسم : الترمومتر الزئبقى والترمومتر الرقمى. 

الترمومتر الرقمى أفضل و آمن أكتر فى الاستخدام لان الترمومتر الزئبقى معرض للكسر وانتشار الزئبق السام.

1. قياس درجة الحرارة من تحت الإبط :
   طريقة غير دقيقة لقياس درجة الحرارة لأنها عادة بتحسب درجة الحرارة أقل درجة مئوية واحدة من درجة الحرارة الحقيقية للجسم، لكنها فعالة مع الأطفال أقل من 4 سنوات.
   ثبت رأس الترمومتر الرقمى تحت إبط الطفل واستنى دقيقة او لحد ما تسمع صوت صفارة وبعدين اقرأ الدرجة الظاهرة على الشاشة.
   
   
2.  قياس درجة الحرارة من الفم :
   البالغين والأطفال أكبر من 4 سنين بيتم قياس درجة حرارتهم عن طريق الفم بالترمومتر الرقمى.
   * عقم الترمومتر كويس بالمياة والصابون او الكحول واشطفه
   * شغل الترمومتر الرقمى و ثبته فى ابعد مكان فى الفم تحت اللسان لمدة دقيقة لحد ما تسمع الصفارة.
   * الفم لازم يكون مقفول لانه لو مفتوح هيسبب خطأ فى قياس درجة الحرارة
   * اتجنب أكل أو شرب اى حاجة سخنة او باردة قبل قياس درجة الحرارة بـ 15 دقيقة عشان متأثرش على النتيجة.

طرق بسيطة لعلاج الحمى فى البيت :

1. خليك فى البيت
   الحمى بتسبب تعب وارهاق فى الجسم ، عشان كدة لازم تستريح فى البيت ومتتحركش كتير عشان تدى فرصة لجسمك انه يقاوم ويتعافى أسرع. وكمان عشان متنشرش العدوى لو الحرارة بسبب دور برد أو انفلونزا.
2. حافظ على ترطيب جسمك
   اشرب سوائل كتير عشان تعوض الجفاف اللى بيحصل لجسمك بسبب الحمى من خلال العرق الكتير وارتفاع درجة حرارة الجسم. اشرب ماية وعصاير و سوائل دافية ولو حسيت ان الجفاف شديد لازم تستشير دكتور.
3. كمادات باردة
   قلل درجة حرارة جسمك باستخدام كمادات باردة مش مثلجة على الجبهة والرقبة. خلى بالك متكونش الكمادات مثلجة عشان متعملش صدمة للجسم.
4. متاخدش أدوية
   زى ما قلنا ان الحمى مش مرض، عشان كدة متاخدش ادوية عشان ممكن الحالة تسوء و أدى فرصة لجسمك انه يتعامل معاها بطبيعته.
   لو كنت مش قادر تتحمل ألم العضلات او الصداع ممكن تاخد أدوية مسكنة خفيفة، لكن خلى بالك انها مش بتعالج الحمى لكن بتقلل أعراضها بس
5. قيس درجة الحرارة
   مرتين فى اليوم زى ما وضحنا فوق عشان تعرف اذا كنت بتتحسن ولا لأ.

 لو درجة حرارتك فضلت عالية اكتر من يومين ومش بتنزل لازم تستشير دكتور فوراً. 

احجز دلوقتى عند دكتور باطنة من على موقعنا وأطمن على نفسك أو لو طفلك هو اللى بيعانى من الحمى احجز عند دكتور أطفال وأطمن على صحة طفلك.