١٠ أعراض بتدل على مشكلة في القلب لازم تخلي بالك منها

يا تري لو عند مشكله في القلب هتعرف؟
لازم تعرف إن مش كل مشاكل القلب بيكون ليها أعراض واضحه. يعني مش دايما هتحس بانقباض في الصدر وبعدها هتقع على الأرض زي مابنشوف في الأفلام. بعض أعراض مشاكل القلب مابتبقاش في منطقه الصدر ومبتكونش واضحة وصريحه. عشان كدا لو عندك زيادة في الوزن أو بتعاني من مرض السكر (السكري) أو ارتفاع نسبه الكوليسترول أو ضغط الدم او  انت فوق الخميسن لازم تبقي مهتم بالفحوصات المتعلقة بمشاكل القلب.

اعراض مشاكل القلب:

1. اضطراب في منطقه الصدر:
   دي اكتر علامه ممكن تبينلك إن عندك مشاكل في القلب. لو في عندك انسداد في الشرايين أو عندك ازمه قلبيه فهتحس بألم وضيق وضغط في منطقه الصدر. الإحساس بيختلف في الاضطراب دا فأحيانا بتحس ان في ضغط كبير علي الصدر زي ما يكون في فيل فوق صدرك و أحيانا بتحس بالم و حرقه في منطقه الصدر. الإحساس دا بيستمر لدقايق و ممكن يحصل في وقت الراحه او في حاله القيام بمجهود بدني.
   
   بس لو الألم بسيط أو في منطقه معينه وبتحس بيه في حاله الضغط على المنطقة دي فدا في الغالب مش مشكله في القلب بس لازم تستشير الطبيب. لكن لو الألم مستمر أو شديد فلازم تتصل بالطوارئ. بس مش معني كدا إن مشاكل القلب مرتبطة بألم في الصدر.
   
   
2. الغثيان ، عسر الهضم ، حرقه المعدة و الآلام في المعدة:
   بعض الناس بتحصلهم الأعراض دي في حاله الأزمة القلبية واحيانا بتوصل للقيء. في الغالب الأعراض دي بتظهر عند النساء اكتر. طبعا عسر الهضم و اضطراب المعدة ممكن يكون ليه أسباب كتير غير مشاكل القلب لكن الحذر واجب.
   
   
3. ألم بينتشر علي طول الذراع:
   من الأعراض التقليدية للازمات القلبية هو الم بينتشر في الغالب في الجزء اليسار من الجسم. غالبا بيبدأ الألم من منطقه الصدر وبينتشر ناحية الذراع. وفي حالات كتير حصلت معاها الأعراض دي.
   
   
4. الإحساس بدوخة أو دوار:
   حاجات كتير ممكن تخليك تحس بالدوخة أو الإغماء للحظات و منها قله الأكل أو الشرب أو الوقوف بسرعه. لكن لو حسيت بإغماء أو دوخه مفاجأة مع الم في الصدر و صعوبة أو ضيق في التنفس فلازم تكلم دكتور حالا.
   لأن دا ممكن يكون إن معناه إن الضغط قل بشكل ملحوظ و القلب مش قادر يضخ الدم بالشكل الطبيعي.
   
   
5. ألم في الزور أو الفك:
   الم الزور أو الفك ملوش علاقه مباشره بمشاكل القلب ولكن بيكون بسبب مشاكل عضليه أو برد أو التهاب في التجاويف أو الجيوب الأنفية لكن لو حسيت بالم في الصدر و بينتشر في منطقه الفك و الزور فلازم تقلق لان دا من أعراض الأزمة القلبية و لازم تكلم الطوارئ أو تراجع طبيب و تتأكد إن مفيش مشاكل.
   
   
6. بتحس بالتعب و الإرهاق بسرعه:
   لو حسيت بإرهاق أو تعب بعد ما عملت أي نشاط كنت بتعمله قبل كدا بدون أي تعب أو مشقه زي الأنشطة اليومية فلازم تراجع الطبيب في اسرع وقت.
   التغييرات دي مهمه جدا اكتر من الألم. الإرهاق و التعب المفاجئ و بدون سبب ممكن يكون من أعراض مشاكل القلب خصوصا للسيدات.
   
   
7. الشخير و العرق:
   من الطبيعي إن بعض الأشخاص بتشخر أثناء النوم. لكن في حاله الشخير بصوت عالي واللي بيكون بتنهيد وصعوبة في التنفس أو اختناق ف دي علامة علي توقف التنفس أثناء النوم لفتره بسيطة. و دا بيؤدي لضغط زائد علي عضله القلب. ممكن تتابع مع الطبيب لتنظيم التنفس من خلال تمارين أو عقاقير أو من خلال جهاز لضبط معدل التنفس Continuous Positive Airway Pressure (CPAP)
   - و بالنسبة للعرق فالعرق البارد بدون أي سبب بيكون علامه لمشاكل في القلب و بيحتاج عنايه طبيه و استشاره طبيب خصوصا لو كان معاه أي من الأعراض الأخرى.
   
   
8. كحه مستمرة:
   في الغالب الكحة مش علامه من علامات مشاكل القلب لكن لو عندك مشكله في القلب مع وجود الكحة المستمرة فلازم تكون حريص جدا.
   لو الكحة مستمرة و بيصاحبها وجود مخاط ابيض أو وردي في الغالب دا هيكون علامه من علامات فشل في وظائف القلب. و في الحالة دي القلب بيكون مش قادر يتوافق مع متطلبات الجسم و دا بيسبب تسرب دم للرئتين.
   و من الأفضل متابعه الطبيب لمعرفه السبب.
   
   
9. ورم في الساق و القدم و الركبة:
   دا ممكن يكون علامه إن الدم مبيتضخش بفاعليه للساق و دا بيحصل لما بيكون القب مش قادر يضخ الدم بالسرعة و الفاعلية الكافية فالدم بيرجع مرة تانية في الأوردة و بيسبب انتفاخ. مشاكل القلب بتخلي الكلى مبتقدرش تتخلص من المياه الزايده و الصوديوم من الجسم و دا بيؤدي إلي الانتفاخ.
   
   
10. ضربات القلب الغير منتظمة:
    من الطبيعي ان القلب احيانا ضرباته بتكون غير منتظمة زي لما بيكون الشخص في حاله عصبيه أو مثار. لكن لو عدم انتظام ضربات القلب بيستمر لفترات طويله اكتر من مجرد بعض الثواني فلابد من استشاره الطبيب.
    
    لو شاكك ان عندك مشاكل في القلب وحابب تتطمن على صحتك تقدر تحجز عند دكتور قلب من خلال موقعنا

References:

• https://www.webmd.com/heart-disease/features/never-ignore-symptoms#1
• https://www.mayoclinic.org/diseases-conditions/heart-disease/symptoms-causes/syc-20353118
• https://www.medicinenet.com/heart_attack_symptoms_and_early_warning_signs/article.htm#what_is_a_heart_attack