مقال مهم لو فوق الـ 30 سنه سرطان البروستاتا و اعراضه و ازاي تقلل الاصابه به.

سرطان البروستاتا بيصيب غدة البروستاتا المسئولة عن التحكم فى البول ، وعن انتاج بعض السوائل المكونة للمنى. وهو من أكثر انواع السرطان المنتشرة بين الرجالة، لكنه ممكن يتعالج بنجاح لو تم اكتشافه فى مراحل مبكرة قبل ما ينتشر لأماكن تانية. 

أعراض سرطان البروستاتا:

غالباً مش بيكون فيه اى اعراض فى المراحل المبكرة من المرض، لكن لو ظهرت أعراض بتكون:

• احساس مستمر بالحاجة للتبول، خاصة بليل
• صعوبة فى بدأ التبول والحفاظ على استمراره
• وجود دم فى البول
• ألم اثناء التبول اواثناء القذف فى العملية الجنسية 
• صعوبة فى الحفاظ على الانتصاب اثناء العملية الجنسية

الأعراض دى ممكن تكون بسبب أمراض تانية غير سرطان البروستاتا، زى مثلاً عدوى فى غدة البروستاتا او مرض السكرى. لكن فى كل الأحوال لازم تكشف عند دكتور مسالك بولية لو حسيت بحاجة.

فى حالة تطور المرض لمراحل متقدمة لاقدر الله ، بيظهر اعراض جديدة من اهمها: ألم فى العظام خاصة العمود الفقرى، الحوض، وعظام الفخذ.

أسباب الاصابة بالمرض:

الأسباب المؤدية للاصابة بسرطان البروستاتا مازالت غير واضحة للعلماء، لكن فيه بعض العوامل اللى تعتبر عوامل خطر وبتزيد من احتمالية الاصابة:

1. السن : لو سنك في الاربيعينات فانت معرض للاصابة بالمرض. سرطان البروستاتا نادر الحدوث للأشخاص أقل من 45 سنة ولكن لوظهرت الاعراض لازم تتطمن.
2. النظام الغذائى: الابحاث وضحت أن الاشخاص اللى بياكلوا لحوم حمراء بنسبة كبيرة وبيستهلكوا منتجات ألبان عالية الدسم بنسبة كبيرة بيكونوا أكثر عرضة للاصابة بسرطان البروستاتا. لكن الربط دة بين الأكل والمرض مازال غير واضح وغير مؤكد.
3. بعض الأدوية: ظهرت دراسات بتشير الى ان بعض الادوية المسكنة ممكن تقلل نسب الاصابة بسرطان البروستاتا، ولكن ظهرت دراسات تانية بتقول انه نفس الأنواع بتزيد احتمالية الوفاة من المرض. ومازال فيه جدل بخصوص تأثير الأدوية على المرض.
4. عوامل جينية:  احتمالية اصابتك بسرطان البروستاتا بتزيد لو حد من عيلتك جاله المرض. فخلي بالك من التاريخ المرضى للعيلة، لو والدك أصيب بالمرض فاحتمال انت كمان تصاب بالمرض، لكن لو أخوك هو اللى اتصاب بالمرض فاحتمالية اصابتك بالمرض أعلى بكتير.

احمى نفسك من سرطان البروستاتا

مفيش سبب معروف ومحدد لسرطان البروستاتا. وكمان معظم عناصر الخطر زى السن والعوامل الجينية لا يمكن التحكم فيها. وعلاقة بعض الأدوية والفيتامينات بالمرض مازالت غير محسومة. عشان كدة مفيش حاجة معينة نقدر نقول انها بتحمى من سرطان البروستاتا.

 لكن بعض النصايح العامة لحياة صحية ممكن تقلل من خطر الاصابة بالمرض:

1. خد بالك من وزنك، اهتم بأكل مجموعة متنوعة من الخضار والفاكهة كل يوم.
2. خليك نشيط جسدياً والعب رياضة بانتظام.
3. لو سنك قريب من 40 سنة او اكثر ، لازم تعمل كشف بانتظام على سرطان البروستاتا عشان تلحقه فى مراحله الاولى. 

هتلاقي على موقعنا دكاترة مسالك بولية تقدر تحجز عندهم بكل سهولة:

References:

• https://www.medicalnewstoday.com/articles/150086.php
• https://prostatecanceruk.org/prostate-information/about-prostate-cancer/prostate-cancer-symptoms
• https://www.cancer.org/cancer/prostate-cancer/causes-risks-prevention/prevention.html