عيلتك فيها مرضى سكر اعرف أهم 12 حاجة تقلل إصابتك بيه

مرض السكر هو مرض مزمن بيصيب الملايين من الناس في العالم، عدم معالجته والتحكم في نسبة السكر في الدم بيعمل مضاعفات زي العمى و الفشل الكلوي ومضاعفات تانية خطيرة.

قبل تشخيص الإصابة بمرض السكر، فيه فترة بتكون فيها نسبة السكر في الدم عالية بس مش عالية بما فيه الكفاية لتشخيص الإصابة بالمرض، الفترة دي اسمها فترة (ما قبل السكر) وخلال الفترة دي ممكن نقلل خطر الإصابة بالسكر والتحكم في حدوثه. وده بيتم عن طريق بعض العادات اللي بيتبعها الشخص. 

العادات البسيطة اللى هتبعد عنك مرض السكرى:

1. ابعد عن السكريات والكربوهيدرات المكررة في الأكل

 السكريات والكربوهيدرات المكررة بتتكسر في الجسم لجزيئات سكر صغيرة واللي بيتم امتصاصها و دخولها لمجرى الدم وبعد كده تدخل خلايا الجسم المختلفة بمساعدة هرمون الأنسولين اللي بيتم إفرازه من البنكرياس. لما تاكل كميات كبيرة من السكريات بيحصل استنفاذ لنسبة الأنسولين في الدم فالبنكرياس بيشتغل اكتر وبيضخ كميات أكبر من الأنسولين، وبمرور الوقت بيفقد البنكرياس قدرته على العمل بكفاءة خاصة في الأشخاص المعرضين للإصابة والحاملين لجين المرض فبتقل قدرته على إفراز الأنسولين وبالتالي تقل نسبته في الدم وده بيؤدي بدوره إلى عدم قدرة السكر للدخول في الخلايا لإمدادها بالطاقة فبيتراكم في الدم و يسبب مرض السكر وعشان كدة مرضى السكر بياخدو انسولين.

 2. مارس الرياضة بانتظام
الرياضة بتزود حساسية خلايا الجسم للأنسولين، بالتالي بتقلل نسبة الأنسولين اللي بتحتاجها الخلايا لامتصاص السكر والحفاظ على نسبة السكر في الدم في المستوى الطبيعي.

في أحد الدراسات عن فترة ما قبل السكر تم ملاحظة ان الأشخاص اللي بيعملوا تمارين رياضية متوسطة بتزيد عندهم حساسية الأنسولين ل 51% بينما الأشخاص اللي بيقوموا بتمارين شديدة بتزيد عندهم حساسية الأنسولين بنسبة 85%

• فبشكل عام ممارسة الأنشطة البدنية بانتظام بيزود حساسية وإفراز الأنسولين واللي ممكن تمنع انتقال مرحلة ما قبل السكري لمرحلة الإصابة الفعلية بمرض السكر.

     3. اشرب الماء باستمرار كمصدر أساسي للسوائل في الجسم
والابتعاد عن المشروبات الغنية بالسكريات زي المياه الغازية والمشروبات اللي فيها مواد حافظة وكمان عصاير الفواكه الطبيعية اللي أثبتت الدراسات احتوائها على سكريات وانها مش بتقلل مخاطر الإصابة بالسكر.

     4. قلل وزنك لو كنت مريض بالسمنة

 لأن الدهون الزايدة في الجسم وخاصة في منطقة البطن بتزود مقاومة الأنسولين واللي بتزود من خطر الإصابة بالسكر بشكل كبير.

     5. كفاية تدخين

أثبتت الدراسات ان المدخنين المتوسطين بتزيد عندهم نسبة الإصابة بمرض السكر إلى 44% بينما المدخنين اللي بيدخنوا أكتر من 20 سيجارة في اليوم بتزيد عندهم نسبة الإصابة إلى 61% عن الأشخاص المقلعين عن التدخين، وأثبتت الدراسات ان بعد 5 سنين من توقف التدخين بتقل نسبة الإصابة إلى 13% وبعد 20 سنة بتتساوى نسبة إصابة المدخنين مع اللي عمرهم ما دخنوا في حياتهم.

     6. قلل كمية الاكل في الوجبة الواحدة

حتى لو انت مش عامل دايت عشان تقلل كمية الكربوهيدرات، فتقليل كمية الاكل بيساعد على تنظيم و تقليل كمية السكر والأنسولين في الدم.

     7. سيبك من الكسل والخمول

 مجرد المشي أو تقليل عدد الساعات اللي بتقعد فيها على الكرسي أو استخدام السلالم بدل الأسانسير بيساعد. وفي دراسات بتقول ان الناس اللي بيقضوا معظم ساعات يومهم قاعدين أو في وضعية خمول بتزيد عندهم احتمالية الإصابة بنسبة 91%

     8. خلي الأطعمة الغنية بالألياف في اكلك اليومي

الألياف بتحافظ على الوزن، وكمان أثبتت الدراسات ان الألياف بتحافظ على مستوى السكر في الدم قليل في الأشخاص المصابين بالسمنة وكبار السن والأشخاص في مرحلة ما قبل السكري. لذلك لازم  تتناول كميات من الألياف في الأكل اليومي لتنظيم مستوي السكر.

     9. فيتامين د: 

أساسي وهام في التحكم في مستوى السكر في الدم. أثبتت الدراسات ان الناس اللي عندها نقص في فيتامين د وبتاخد مكملات غذائية بتحتوي عليه بتتحسن عندهم وظائف الخلايا المنتجة للأنسولين وبتتحسن مستويات السكر عندهم و بيقل احتمال إصابتهم بالسكر بشكل ملحوظ. 

فيتامين د بيكون موجود اكتر في بعض الأطعمة زي السمك، وأشعة الشمس اللي بتعتبر مصدر كبير ليه، أو ممكن استخدام مكملات غذائية بتحتوي على فيتامين د.

     10. قلل استخدام الأغذية المحفوظة

 لانها بتحتوى على نسبة عالية من الزيوت والبقوليات المشتقة والمواد الصناعية فبتسبب مشاكل صحية كتير زي السمنة وأمراض القلب والسكر.

     11. اشرب الشاي أو القهوة 

لانهم بيساعدوا على تجنب مرض السكر بحسب بعض الدراسات بسبب احتوائهم على مضادات الأكسدة اللي بتحمي ضد الإصابة بالسكر. والشاي الأخضر اللي بيحتوي على مادة أثبتت فعاليتها في تقليل إفراز السكر من الكبد وزيادة حساسية الأنسولين.

     12. بعض الأعشاب الطبيعية 

اللي بتقلل احتمالية الإصابة بالسكر زي الكركم والبربارين ليهم دور في تقليل مقاومة الخلايا لأنسولين وتحسين وظايف الخلايا المنتجة للأنسولين في البنكرياس وزيادة حساسية الأنسولين.

خلى باللك من العادات البسيطة اللى فوق عشان تحمى نفسك من الاصابة. ولو حسيت بأى عرض من اعراض مرض السكر احجز عند دكتور غدد صماء من على موقعنا.

References:

https://www.healthline.com/nutrition/prevent-diabetes