لو عندك برد او إنفلونزا اطرد المخاط في 3 خطوات

كلنا من وقت للتاني بيجيلنا حساسيه او نزلات برد ومن أعراض الحساسية والإنفلونزا المخاط الزايد في الجيوب الأنفية والأنف والصدر. ومع إن الإنتاج الزايد للمخاط في الغالب بيكون مش مضر لكن بيكون مزعج جدا.

لكن لحسن الحظ في طرق كتير للعلاج من غير ما تحتاج تروح للدكتور .
فلو انت عندك كحه شديده و فيها مخاط و متضايق هنقدر نساعدك ببعض الحلول.

طب إيه هي أهمية المخاط في الجسم؟

ممكن تكون بالنسبة ليك حاجه غريبه لكن جسمك بينتج المخاط دايما، حتى لو صحتك كويسه. في الغالب انت مبتلاحظش دا لكن لما بتتعب جسمك بيزود من إنتاج المخاط وبيسبب أعراض زي سيلان الأنف. وفي الحقيقة المخاط دا هو آليه وقاية لجسمك وبيمتد في خطوط الشعب الهوائية زي الأنف والفم والحلق وبتتجمع فيه الجراثيم والمواد المثيرة للحساسية والمهيجات بدل ما تكمل طريقها لداخل الجسم وكمان بيمنع التنفس من انه ينشف ممرات الحلق والأنف والرئة الهشة.

طب إيه اللي بيسبب المخاط الزائد؟

لما جسمك بيكتشف جسيمات غير مرغوب فيها جايه من الخارج بيزود إنتاج المخاط لطرد ومنع الجسيمات دي من الدخول للجسم.

وفي أسباب كتير ممكن تسبب دا زي:

1. الحساسية من حبوب اللقاح، الغبار، العفن
2. أمراض زي نزلات البرد والإنفلونزا والجيوب الأنفية
3. التدخين بيؤذي الشعب الهوائية عشان كدا الجسم بينتج مخاط اكتر عشان يحمي نفسه.
4. التلوث من خلال العوادم وتلوث الهواء والدخان الناتج من الخشب والمواد الكيميائية.

اتخلص من المخاط في 3 خطوات:

• تناول الأطعمة اللي يتساعد في طرد المخاط زي:

• إشرب شاي بالليمون وحليه بالعسل عشان يطرد المخاد ويهدي الحلق.
• كل أطعمه فيها توابل لأنها بتعتبر مزيل للاحتقان وبتطرد المخاط.
• اشرب سوائل دافيه كتير سواء الشاي او شوربة الفراخ او غيرها لأنها بتساعد في تفتيت المخاط.
• أتغرغر بميه مالحه ودا عن طريق خلط نص معلقه ملح مع كوبايه من الميه الدافيه وتتغرغر بيهم مع ميلان الراس للخلف.
• كل عيش محمص لأنه بيكسر البلغم وبينقله للمعدة وبيزيل البلغم.
• اشرب ميه كتير عشان تساعد الجسم في القيام بوظائفه المعتادة وبيقلل الحاجة لزيادة إنتاج المخاط.
• اشرب معلقه صغيره من خل التفاح مع إن طعمه مش حلو لكن بيساعد جدا في التخلص من المخاط.

لازم تتجنب الحاجات اللي بتسبب المخاط زي:

• التوقف عن التدخين لأنه بيجفف الأحبال الصوتية وبيخلي الجسم ينتج كميه أكبر من المخاط لتعويض الجفاف دا.
• ابعد عن منتجات الألبان أحيانا بيزود إنتاج المخاط وأحيان أخري بيزود من سماكه المخاط.
• لازم تبعد عن الأدخنة والمواد الكيميائية الخطرة لأنها بتؤذي الجهاز التنفسي وبتأثر على وظائفه.

حاجات تانية ممكن تساعد لتخفيف المخاط او التخلص منه زي:

• حاول من وقت للتاني تاخد حمام سخن او تستنشق البخار لان المياه السخنة بتساعد في تخفيف البلغم.
• الهمهمة في أي وقت متاح بتقوم بعمل اهتزازات بتساعد على تفتيت المخاط.
• طرد المخاط من الأنف بشكل منتظم مهم جدا بدل ما نرجع المخاط مره تانية. ولكن الطرد بطريقه قوية بيولد ضغط بيحمل البلغم المليان بالبكتيريا مره تانية لمجري الأذن وبيسبب ألم في الأذن. افضل طريقه لطرد المخاط من الأنف هو بالضغط بالصباع علي ناحيه من الأنف مع النفخ ببساطه من الناحية الأخرى لتنظيفها.
• لازم تاخد بالك إن بلع المخاط غلط جدا ولازم تطرد المخاط سواء عن طريق استخدام المناديل او من خلال بصق المخاط.

الطرق دي من المفترض انها هتساعدك تتخلص من المخاط في خلال يوم او يومين. لكن لو حسيت إن الطرق مش مفيدة بالنسبة ليك لازم تستشير الطبيب في أفضل الطرق اللي ممكن تساعدك على التخلص من المخاط بطريقه آمنه وفعاله. خصوصا لو المخاط لونه اخضر وليه ريحه كريهة او بيحتوي على دم.

لو عندك إنفلونزا أو برد او إفرازات المخاط عندك زايده وحابب إنك تتطمن على صحتك تقدر تحجز عند دكتور انف واذن وحنجره من الدكاترة المتخصصين من خلال موقعنا:

References:

• https://www.wikihow.com/Get-Rid-of-Phlegm-in-Your-Throat-Without-Medicine
• https://healthyline.com/how-to-get-rid-of-mucus/
• https://www.webmd.com/cold-and-flu/features/treating-flu-at-home#1
• https://www.webmd.com/cold-and-flu/12-tips-prevent-colds-flu-1#1