اضرار تسوس الأسنان اللبنية عند الأطفال و 6 طرق لحماية أسنان طفلك من التسوس

الأسنان اللبنية للطفل مؤقتة، بتظهر من سن 6 شهور وبتبدأ فى الوقوع من سن 6 سنوات ولحد 12 سنة ..
لكن هل دة معناه انه لو السن اللبني اتسوس ، مجرد ما يقع المشكلة هتنتهى؟؟  طبعا لأ

دراسة أمريكية بتقول ان 42% من الأطفال من سن سنتين لحد 11 سنة بيعانوا من تسوس الأسنان. نسبة كبيرة سببها الأساسى هو السكر. الأطفال بياكلوا حلويات كتير ومشروبات فيها نسبة سكر عالية.

مثلا، أطفال كتير جداً بتشرب لبن قبل النوم عشان يناموا بسهولة وهدوء، لكن اللبن بيكون سبب في تسوس الاسنان بسبب بقايا الحليب اللى بتفضل فى فم الطفل وهو نايم طول الليل وبتسبب نمو بكتيريا التسوس.

اهم اخطار تسوس الأسنان اللبنية

• بيأثر على الاسنان الدائمة
  السن الدائم بيكون مختفى فى اللثة تحت السن اللبني ، وبكتيريا التسوس مبتعرفش امتى تقف عن النمو والانتشار، ولو زاد التسوس لمرحلة متقدمة من غير علاج هيوصل للسن الدائم حتى قبل ما يظهر.
  
  
• وقوع الأسنان اللبنية قبل معادها
  سقوط الأسنان اللبنية قبل معادها بيأثر على نمو السن الدائمة. بتظهر معوجة وفى غير مكانها الطبيعى.
  
  
• ألم الأسنان
  تسوس الأسنان اللبنية بيسبب ألم زى تسوس الاسنان للكبار. ودة بيأثر على النوم والأكل والنشاط العام للطفل وبالتالي بيأثر على نموه.
  
  
• انكسار السن والتصبغ
  انكسار أسنان الطفل بتأثر بشكل أساسى على طريقة نطقه للكلمات.وده غير ان الطفل بيستخدم أسنانه فى الضحك والأكل واللعب، والتأثير السلبى على شكل أسنانه بيعرضه لحالة نفسية سيئة وخصوصا لو قارن نفسه بزملائه او حصل مضايقة منهم.

الوقاية خير من العلاج .. ومع صحة الفم ، فالوقاية فى سن مبكر أحسن بكتير. 

6 عادات بسيطة عشان تحمى طفلك من تسوس الأسنان اللبنية:

1. لو طفلك مبعرفش ينام من غير ما يشرب حاجة
   خليه يشرب ميه بدل اللبن أو العصير، ولو رفض اتأكد انه بلع كل اللبن او العصير ومفيش اى حاجة متبقية فى فمه قبل ما ينام.
   
   
2. اتأكد ان طفلك بياكل فى أوقات محددة
   ومتسبش أكل فى إيده طول الوقت. وخليك فاكر انه طول ما فى إيده أكل والأكل بيفضل فى فمه مدة أطول، كل ما بتزيد احتمالية تسوس أسنانه.
   
   
3. قلل(ي) من السكريات والحلويات فى أكل طفلك
   لأن السكريات بتكون أحماض بتمتص الكالسيوم من المواد المكونة للأسنان، ودة بيسبب ضعف الأسنان وتسوسها.
   
   
4.   حافظ على طفلك من العدوى
   بكتيريا تسوس الأسنان بتنتقل بالعدوى واللعاب ، أوقات كتير بنشارك الحلويات مع اطفالنا، وفيه أمهات كتير ممكن تاخد معلقة مثلاً فى فمها وبعدين تديها لابنها فى فمه، ودة غلط جداً صحياً بالاضافة لأنه لو كنت تعانى من تسوس الأسنان بكتيريا التسوس هتتنقل لابنك.
   
   
5. عود(ي) طفلك على روتين صحى عشان يحافظ على اسنانه
   خلي طفلك يغسل اسنانه مرتين فى اليوم بالفرشاة، وافتكر انه سهل على طفلك انه يتعود على عادات صحية  فى سن صغيرة وهتفضل معاه طول العمر.
   
   
6. فى حالة ظهور تسوس ولو بسيط فى الأسنان اللبنية لطفلك
   روح(ي) لدكتور الأسنان وعالج(ي) طفلك من التسوس قبل ما ينتشر للاسنان المجاورة او للسن الدائم المختفى تحت اللثة.

ولو بتدور(ي) على دكتور اسنان اطفال كويس هتلاقي على موقعنا مجموعة من افضل دكاترة اسنان الاطفال:

Reference 

• https://www.colgate.com/en-us/oral-health/life-stages/childrens-oral-care/toddler-tooth-decay-and-how-to-prevent-it-0314
• https://www.nidcr.nih.gov/research/data-statistics/dental-caries/children
• https://www.cda.org/Portals/0/pdfs/untreated_disease.pdf
• https://www.sharecare.com/health/childrens-oral-health/does-decay-baby-teeth-adult