اشهر 5 أنواع صداع وإزاي تتخلص منهم بسهولة

الصداع ممكن يكون معقد جدا اكتر مما نتخيل. في أنواع كتير من الصداع و كل نوع منهم ليه أعراضه و أسبابه و علاجه مختلف.
بمجرد ماهتعرف نوع الصداع اللي عندك ممكن تستشير الدكتور عشان تلاقي افضل علاج و ممكن كمان افضل طريقه لمنع حدوثه.

إيه هي أنواع الصداع؟

في اكتر من 150 نوع مختلف من الصداع لكن الأكثر انتشارا منهم هم ال 5 أنواع دول:

1. صداع التوتر:
   و دا النوع الأكتر انتشارا بين المراهقين و البالغين  و دا بيسبب الم خفيف او متوسط و بيجي و يروح كتير بمرور الوقت و في الغالب مبيكونش ليه أعراض تانية.
   
   
2. الصداع النصفي:
   الصداع النصفي في الغالب بيكون صداع شديد و بنحس معاه بخبط و نبض في الرأس و ممكن يستمر من 4 ساعات ل 3 أيام.
   و ممكن يحصل بمعدل من 1 إلي 4 مرات في الشهر.
   و في ناس ممكن يحصلها أعراض تانية زي الحساسية للضوء و الضوضاء او الروايح و أحيانا غثيان و قيء  و فقدان الشهية و اضطراب المعدة و الم البطن.
   
   
3. الصداع العنقودي:
   هو نوع شديد جدا من أنواع الصداع و بنحس معاه بالم شديد جدا ورا او حوالين عين واحده. ممكن يكون النوع دا مش منتشر جدا زي الباقي
   بس هو اشد الأنواع الم لدرجه انه ممكن يخلي المريض بيه ميقدرش يفضل قاعد لفتره طويله و يتحرك بشكل مستمر في فتره الألم و بيحس بإن جفن العين متدلي و العين بتحمر بشكل واضح و نني العين بيضيق جدا و بيكون في دموع و بيحس بجريان في الأنف.
   و بيسمي الصداع العنقودي لأنه بيحصل في مجموعات. ممكن يحصلك الصداع العنقودي 3 مرات في اليوم خلال فتره الصداع واللي ممكن تستمر من أسبوعين ل 3 أشهر. و ممكن الصداع يصحيك من النوم من شده الألم.
   
   
4. صداع الجيوب الأنفية:
   بتحس معاه بالم عميق و مستمر في عظام الخد او الجبين او منطقه الأنف و دا بيحصل لما بيجيلك التهاب في الجيوب الأنفية. و غالبا بيجي الألم دا مع أعراض الجيوب الأنفية التانيه زي سيلان الأنف و انسداد الأذن و الحمي و الورم في الوجه.
   
   
5. الصداع الهرموني:
   و دا بتصاب بيه الستات مع تغيير مستويات الهرمونات خلال وقت الدورة الشهرية و الحمل و انقطاع الطمث و بردو أحيانا بتسبب حبوب منع الحمل تغيير في الهرمونات و بالتالي الصداع الهرموني.

إزاي أعالج الصداع؟

علاج الصداع بيختلف علي حسب السبب. بمعني إن الصداع لو مرتبط بمرض فمن المؤكد انه هيزول بزوال او علاج المرض نفسه. و معظم أنواع الصداع ممكن يتم علاجها من خلال استشاره الدكتور ووصف علاج للمريض او العلاج بالادوية مابتحتاجش وصفه طبيه زي الأسبرين و الاسيتامينوفين و الايبوبروفين.

لو الأدوية ماكنتش هي الحل بالنسبة ليك ففي علاجات تانية ممكن تساعدك في التغلب علي الصداع زي:

1. الارتجاع البيولوجي وهي تقنيه استرخاء بتساعد على التحكم في الألم.
2. دروس إدارة الإجهاد ممكن تعرفك إزاي تتعامل مع التوتر والإجهاد وإزاي تخفف منهم.
3. العلاج السلوكي هو نوع جديد من العلاج واللي بيساعدك تعرف المواقف اللي بتحطك في توتر وقلق.
4. العلاج بالإبر هو علاج بديل بيقلل من الإجهاد والتوتر من خلال وخز الجسم بإبر في أماكن معينه.
5. التمارين الرياضية الخفيفة بتساعد في إفراز مواد كيميائية معينه في المخ بتخليك تحس بالسعادة والاسترخاء.
6. العلاج بالكمادات الساقعه او السخنة علي الرأس لمده من 5 ل 10 دقايق اكتر من مره في اليوم.
7. انك تاخد دش سخن عشان يساعد عضلات جسمك المتوترة علي الاسترخاء.
   

لو عندك الأعراض أو حابب إنك تتطمن على صحتك تقدر تحجز عند دكتور باطنه من الدكاترة المتخصصين من خلال موقعنا:

References:

• https://www.healthline.com/health/headache#treatments
• https://www.webmd.com/migraines-headaches/migraines-headaches-basics#1