أفضل الطرق لتبييض الأسنان

الاسنان البيضاء بتعلي من إحساس الثقة بالنفس وبتخليك في أي مكان تروحه تشارك وإنت مش قلقان إن سنانك الصفراء تبان وقت ما تتكلم أو تضحك.
الأسنان البيضاء كمان بتديك سن أصغر من سنك، وفي أي إنترفيو فرص قبولك بتعلى لإن لما تبتسم بيدي انطباع أحسن عنك كمان الأسنان البيضاء بتخليك حريص دايمًا على الحفاظ على بياضها وتنظيف أسنانك باستمرار وده بيحافظ على الفم بصحة جيدة.

ليه أسنانا بتصفر؟

طبقة الأسنان الخارجية (وهي:المينا) لونها أبيض وبتحمي الطبقة اللي تحتها، الطبقة اللي تحت المينا إسمها العاج لونها بني مصفر.
لو طبقة المينا اتاكلت أو بقت خفيفة بتظهر الطبقة الصفراء اللي تحتها.
إيه يخلي طبقة المينا تضعف؟ الأطعمة الحمضية وأمراض اللثة، وعند بعض الناس بتكون طبقة رفيعة طبيعي.كمان بعض الأطعمة أو المشروبات زي القهوة بتسيب صبغة على طبقة الأسنان الخارجية.. ودي بتروح بالمحافظة على الغسيل المستمر للأسنان.
التدخين كمان بيصفر الأسنان، بالإضافة إن الأسنان بتصفر مع التقدم في العمر، لكن المحافظة على غسيلها وتنضيفها باستمرار بيأخر اصفرارها ويخليها بيضاء.

إزاي نبييض الأسنان؟

تبييض الأسنان بيتم عن طريق إزالة الصبغات المتراكمة على الأسنان.
طرق تبييض الأسنان آمنة، في منها كذا طريقة بيختلفوا في سرعة التأثير والنتيجة الفعالة و التكلفة.

1-تبييض الأسنان في البيت

في كذا طريقة لتبييض الأسنان في البيت تكلفتهم بتكون قليلة وبيشيلوا الصبغة من الطبقة السطحية بس
-بيكربونات الصوديوم: جفف أسنانك وبعدين حط فرشة الأسنان المبللة في بودرة بيكربونات الصوديوم واستخدم الفرشة في تنظيف أسنانك لمدة ٣ دقايق واغسل سنانك بعدها. او اخلط مقدار معلقة ص. بيكربونات مع معلقة ص. مائة واغسل أسنانك بالخليط ده احذر من استخدام البيكربونات اكتر من مرتين في الاسبوع عشان متسبيش ضرر للمينا. بالإضافة لتبييض الأسنان بيكربونات الصوديوم بتمنع تكاثر البكتريا وتقلل منها في الفم.
-فوق أكسيد الهيدروجين: بقطنة مبللة بفوق أكسيد الهيدروجين تركيز 1.5٪ إدعك بها أسنانك هيساعد في إزالة الصبغات من على الأسنان،وكمان إنعاش النفس مينصحش بيه للناس اللي أسنانها حساسة ممكن يزود حساسية الأسنان.
-خليط من بيكربونات الصوديوم وفوق أكسيد الهيدروجين: بخلط معلقة ص. بيكربونات مع معلقتين ص. فوق اكسيد الهيدروجين خلطهم مع بعض بيدي نتيجة أفضل في تبييض الأسنان. دراسة بتقول إن استخدام معجون أسنان محتوي على الخليط ده مرة يوميا بيخلي السنان ابيض بنسبة ٦٢٪ في ست اسابيع
-المضمضة بالزيت : هو تقليد هندي لنضافة الفم من البكتيريا اللي ممكن تؤدي لاصفرار الاسنان مع إن مفيش دراسة علمية تثبت ده لكن بالتجربة المضمضة بالزيت بشكل منتظم بتخلي الفم نضيف وبتمنع اصفرار الاسنان الطريقة دي لمحافظة على نضافة الأسنان وبياضها؛لكن مش لإزالة الاصفرار الافضل في المضمضة هو زيت جوز الهند؛ طعمه مقبول وليه فوائد صحية إضافية

2-منتجات تبييض الأسنان:

-معجون تبييض الأسنان: طريقة آمنة لتبييض الأسنان وإزالة الصبغة من الطبقة السطحية بس مبتحتويش على مادة كارباميد بيروكسيد فمفيش ضرر على اللثة
-شريط التبييض: فعالة وسريعة في تبييض الاسنان متزوديش عن الوقت المكتوب عليه عشان ميسببش ضرر،كمان يفضل متاكلش أو تشرب بعده بنص ساعة

3-التبييض في عيادات الأسنان:

في عيادات الأسنان بيقرر الطبيب الطريقة اللي تناسبك في تبييض الأسنان، واحدة من الطرق دي هي الليزر و بالتأكيد طرق تبييض الأسنان عند طبيب الأسنان أقوى من الطرق التانية.
الآثار الجانبية المحتملة: ممكن يبقا في آثار جانبية زي ألم بسيط لكنه مؤقت وبيروح بعدها بوقت قصير، لو خد وقت طويل راجع الطبيب.

الاستخدام المفرط لأي من المبيضات بيضعف طبقة المينا ويسبب ضرر في الأسنان.
بعد إجراء أي واحدة من الطرق دي هتحتاج إنك تحافظ على النتيجة اللي وصلتلها وتخلي أسنانك دايما بيضاء المعجون المحتوي على الفلوريد هيكون مفيد جدا في ترميم طبقة المينا وسد الثقوب الصغيرة و بالتأكيد من الأفضل الحفاظ على تنضيف الأسنان بشكل مستمر عشان متتراكمش عليه الصبغات وتؤدي لاصفرارها.
ينصح الأطباء الانتظار بعد الاكل نص ساعة بعدين غسل الأسنان. والمحافظة على النظام الغذائي غني بالفواكة (بالأخص الفراولة و الاناناس) لإنها بتحافظ على إن الأسنان تفضل بيضاء، وكمان التقليل من شرب الشاي والقهوة والكولا وفي حالة شربهم يفضل غسيل الأسنان بعدهم، وتقليل الأطعمة الحمضية عشان دي بتسهل إزالة طبقة المينا، وتقليل السكر تناول الأطعمة الأغنية بالكالسيوم مفيد جدا؛ عشان بيحمي الطبقة البيضاء.

لو في اصفرار في الاسنان احجز عند دكتور اسنان من الدكاتره المتخصصين..

المراجع:

https://www.medicalnewstoday.com/articles/322421.php#how-to-whiten-teeth-naturally
https://www.webmd.com/oral-health/teeth-whitening#1