أفضل أطعمة لطفلك الرضيع، وإيه الأطعمة اللي تتجنبيها

بمجرد ما بتعرفي إن طفلك مستعد يبتدي ياكل بيجي في بالك السؤال المهم وهو إيه أحسن أكل ممكن تقديمه لطفلك في بداية تجربته للأكل؟ وهل هو مستعد انه يبتدي ياكل حاجات صلبة بالنسبة له ولا لأ؟
الرضاعة الطبيعية بالتأكيد هي أفضل شئ تقدميه لطفلك.ومش شرط لما تلاقي طفلك بدأ يستجيب للأكل من برة إنك توقفي الرضاعة. لكن تستمري في الرضاعة وفي تقديم أكل لطفلك ده هيكون مفيد ليه.

إزاي اعرف إن طفلي مستعد ياكل مواد صلبه؟

1. يقدر يقعد لوحده بدون مساعده.
2. بيبتدي يهتم بالأكل الموجود حواليه.
3. بيبتدي يقلد سلوكيات الأكل اللي بيشوفها مع الكبار.
4. مبيرفضش الأكل لو حاولتي تخليه يجربه.

بداية إدخال الأكل للطفل بجانب الرضاعة بتكون مش قبل 6 شهور، وبتبتدي بالتدريج تديله كمية بسيطة وتراقبي النتيجة لمدة كذا يوم وبعدين تزودي بالتدريج، وابتدي بكل صنف لوحده لحد ما تتأكدي من قبول جسم طفلك ليه.

لازم تبقي عارفه إن الأطفال ليهم احتياجات خاصه في الأكل، ومش كل العناصر اللي بيحتاجها طفلك بتكون موجودة في الخضروات والفاكهة بس، الطفل كمان بيحتاج عناصر غذائية مهمة جدًا وبتكون موجودة في الدهون الحيوانية والبروتين اللي بيساعدهم في النمو العقلي والعظمي والعضلي.
مجري الجهاز الهضمي عند الطفل بيكون لسه صغير جدا وغير ناضج وعشان كدا بيحتاج لأكبر تأثير غذائي ممكن وفي نفس الوقت سهل في الهضم.

والعناصر الهامة جدًا للطفل بعد أول 6 شهور كتير زي:

• البروتين
• الدهون
• الحديد
• الزنك
• فيتامين ب6
• فيتامين ب3
• فيتامين هـ
• الكالسيوم
• الفوسفور
• الماغنيسيوم
• دهون الأوميجا 3 والأوميجا 6 بالنسب الصحيحة.

وبعد فتره ال 8 شهور الأولي بيحتاج بردو لعناصر زي:

• فيتامين أ، ب، جـ، د، كـ
• البوتاسيوم

أفضل الأطعمة لطفلك في أول تجربته مع الأكل :

1. اللحوم :
   فيتامين ب6, ب12 ,والحديد والزنك من أهم العناصر الموجودة في اللحوم. والمقصود باللحوم هو اللحم البقري وخاصة اللحم الأحمر.
   التحضير: عشان ميكونش أكل اللحوم للطفل صعب ممكن تضربيها في الخلاط عشان يكون سهل في الأكل و البلع.
   العمر المناسب للطفل: 7:10 شهور او أكتر
   
   
2. الزبادي
   الزبادي كامل الدسم مفيد للأطفال وسهل في الهضم، ويعتبر غذاء متكامل من الدهون والبروتين وسكر اللبن ، وبيحتوي على الكالسيوم وفيتامين د وباكتيريا نافعة،على عكس اللبن البقري الطفل ميقدرش يهضمه في السنين الأولى لكن الزبادي هيكون سهل في الهضم و مفيد للطفل.
   العمر المناسب للطفل: من سن 9 شهور
   ابتدي بكمية صغيرة جدًا معلقة صغيرة وانتظري رد فعل جسم الطفل، تاني يوم زودي الكمية لحد م توصل لربع كوب في اليوم.
   
   
3. صفار البيض
   صفار البيض بيحتوي على عناصر غذائية بتساعد علي بناء مخ الطفل والعين و كمان بيحتوي علي الكوليسترول المهم في تكوين الهرمونات و بيحتوي علي عناصر زي الكالسيوم و الزنك و السيلينيوم و الفوسفور و فيتامين هـ و فيتامين ب6.
   طريقة التحضير: اطهيه لطفلك بقليل من الزيت أو الزبدة.
   
   
4. الأفوكادو
   الأفوكادو بيحتوي علي دهون صحية وعناصر مهمة للطفل زي الماغنيسيوم اللي بيسبب حيوية و نشاط للطفل و بيكون نادر في اكله، كمان بيحتوي علي فيتامينات ب و النياسين و فيتامين هـ و فيتامين كـ و البوتاسيوم و حمض الفوليك و الألياف.
   العمر المناسب للطفل: من سن 6 شهور
   التحضير: هرسه عشان يبقا سهل في الهضم، ولو الطفل كبير يقدر ياكله قطعيه لشرايح.
   
   
5. الموز
   الموز بيحتوي علي الكربوهيدرات و إنزيم الاميليز المهم جدا للطفل في عمليه هضم الكربوهيدرات و كمان بيحتوي علي فيتامين ب 6 و فيتامين جـ و المنجنيز و الماغنيسيوم و البوتاسيوم.
   التحضير: قطعيه واهرسيه وأطعميه للطفل أو قدميه مع حليب الرضاعة أو الأفوكادو.
   
   
6. القرع
   القرع سهل الهضم للطفل و بيحتوي علي الكربوهيدرات و بيحتوي علي فيتامين أ و فيتامين جـ و الماغنيسيوم و البوتاسيوم و المنجنيز.
   العمر المناسب للطفل: 6:8 شهور أو أكتر
   
   
7. التوت
   بيحتوي علي مضادات الأكسدة بنسب كبيره و بيحتوي علي مركبات الفلافونويد اللي بتقوي و تفيد العيون و الدماغ و المسالك البولية.
   
   
8. البروكلي
   بيحتوي علي الألياف و حمض الفوليك و الكالسيوم و بيساعد علي الوقاية من السرطان.
   
   
9. العدس
   البقوليات زي العدس و الفول بتحتوي علي كتير من البروتينات و الألياف .
   طريقة التحضير: طبخ العدس مع قطع الجزر المقطعة
   
   
10. البطاطا
    البطاط المطبوخة من أكتر الأكلات المحببة عند الأطفال و الرضع لأن طعمها حلو، والأهم إنها صحية لأنها بتحتوي على البيتا كاروتين اللي بيتحول في الجسم لفيتامين أ ،و فيتامين جـ والمعادن زي الحديد و النحاس.
    العمر المناسب للطفل:أكبر من 6 شهور
    
    
11. البازلاء الخضراء
    لو حبيتي تبدأي في تقديم الأطعمة الخضراء للطفل، فابدأي مع البازلاء الخضراء، بتحتوي على نسبة عالية من النشا، دا معناه إنها مقاومة للهضم ، بتاخد وقت في حركتها من المعدة والأمعاء الدقيقة إلى الأمعاء الغليظة ،بكده تغذي الباكتيريا النافعة.
    التحضير: هرس البازلاء الخضراء مع القرع بيلطف طعمها للطفل لو رفض ياكلها لوحدها.
    
    
12. الحبوب
    على الرغم من إن الحبوب الطفل مش بيقدر يهضمها لإنه معندوش الإنزيم اللي بيساعد في هضمها، لكن الحبوب مفيدة للطفل لإنها بتفضل فترة أطول في الأمعاء فبتغذي البكتريا النافعة.
    التحضير: انقعي الحبوب بليل في ماء مفلتر مع القليل من خل التفاح، اطبخيها لفترة طويلة على نار هادية حتى تستوي الحبوب على أخرها وتهرسيها للطفل مع خلطها بقليل من لبن الأم
    العمر المناسب للطفل: لا تقدم للطفل أقل من 7 شهور
    
    

أطعمة لا تعطيها لطفلك:

• العسل
  لا يفضل إنك تاكلي الطفل عسل قبل ما يتم سنة
  
• المكسرات والفول السوداني
  بإمكانك تضيفي زبدة الفول السوداني الكريمية لطفلك على البسكويت ولكن لما يتم سنة، وبلاش ياكل المكسرات أو السوداني لحد سن 4 سنين عشان متسببلوش إختناق
  
• اللبن البقري
  لا يستطيع الأطفال هضم حليب البقر بسهولة، لذلك يوصي الخبراء بالإنتظار حتى عام واحد قبل تقديمه.
  
• السبانخ والكرفس والخس والفجل واللفت والأخضر ينصح بها بعد 8 أشهر.
  
• الطماطم والحمضيات لا تعطيها للطفل قبل 9 شهور.
  
  

أهمية إدخال مسببات الحساسية في وقت مبكر ومتكرر ابتداء من 6 أشهر

تعريف الأطفال على مسببات الحساسية الشائعة قبل بلوغهم عامهم الأول، بيخليهم أقل عرضة للإصابة بالحساسية بحسب دراسات حديثة.
وأظهرت الأبحاث إن بمجرد استعداد الطفل لتناول الطعام في عمر حوالي 6 أشهر، فإن الأطفال المعرضين لخطر الإصابة بحساسية نوع معين من الأكل، كانوا أقل عرضة للإصابة بالحساسية لما اتقدملهم الأكل ده قبل ما يبلغوا عامهم الأول.
لو مكنتيش عارفة إزاي تبدأي مع طفلك في إدخال مسببات الحساسية المعروفة إستشيري الطبيب.

لو حابه تعرفي عن أفضل طرق التغذية لطفلك او تتابعي صحة طفلك باستمرار ممكن تحجزي وتتابعي عند دكتور اطفال شاطر من خلال موقعنا

المراجع:

• https://www.thebump.com/a/best-foods-for-baby
• https://www.mamanatural.com/best-first-foods-for-baby/
• https://www.parents.com/baby/feeding/nutrition/best-super-foods-for-baby/
• https://www.babycenter.com/0_the-10-best-foods-for-babies_10320505.bc