أشهر ١٠ أمراض ممكن تصيب طفلك في سنواته الأولى

بصفتكم أب او أم أكيد عالجتوا أمراض كتير لأطفالكوا و حسيتوا إن بقى عندكوا خبرة في الرعاية الطبية للأطفال.
وده لأن الأطفال معرضين للإصابة بالأمراض أكتر من الكبار لأن جهازهم المناعي لسه مش قوي زي الكبار ومتدربش بشكل كفاية على مواجهة الأمراض.
في المقال ده هنتكلم عن 10 أمراض شائعة جدًا بتصيب الأطفال لازم كأب وكأم تكونوا عارفينهم.

1. نزلات البرد:
   نزلات البرد متوقع تحصل للطفل تقريبًا 5 مرات في السنة خصوصًا في السنين الأولي.
   أعراض نزلة البرد بتكون عبارة عن حمي وإحتقان وكحة وإلتهاب في الزور،الراحة والسوايل الدافية مهمين عشان نقلل من أعراض نزلات البرد.
   الأدوية اللي بتحتوي علي ايبوبروفين او أسيتامينوفين بيساعدوا في تقليل الحمى ولكن لازم استشارة الطبيب قبل أخد أي دوا بالذات لو الطفل أقل من 6 شهور، يفضل تبعد عن أدوية الكحة و البرد، و نحاول تقطير مياة مالحة جوا ممرات الأنف للترطيب.
   الطفل بيتعافي من نزلات البرد غالبًا في خلال من 5 إلي 7 أيام.
2. فيروس الجهاز التنفسي :
   الفيروس ده بيصيب الجهاز التنفسي وبيتعرضله الأطفال بشكل أكتر من غيرهم خصوصًا اللي أعمارهم اقل من سنتين. و دا بيأثر بشكل أساسي علي الرئتين و الأعراض غالبًا بتكون بسيطة ولكن ممكن في بعض الحالات تسبب إلتهاب الشعب الهوائية او الإلتهاب الرئوي.
   إحتمالية إصابة الأطفال بالمرض دا بتكون كبيرة نسبيًا. عشان كدا لو حسيت إن طفلك بيتنفس بصعوبة او مش قادر ياخد نفسه أو بيرفض شرب السوائل أو في زرقان في الشفايف لازم تروح للطبيب في اسرع وقت.
3. الطفح الوردي:
   نبتدي بالخبر الكويس و هو إن الطفح الوردي بشكل كبير مش هيصيب الطفل بعد عمر سنتين، وبشكل أكيد مش هيصيب الطفل بعد مرحله رياض الأطفال.
   في بعض الأحيان مبيكونش الطفح الوردي ظاهر عند الطفل لدرجة ممكن متلاحظوش. ولكن في أحيان تانية ممكن يصاب الطفل بحمى شديدة أو إحتقان أو كحة وبعده بيبدأ الطفح الجلدي ينتشر بداية من منطقه الصدر والرقبة بعد كده الوجه والأطراف. و في الغالب بيروح الطفح الوردي في خلال أسبوع لكن لو الحمي إرتفعت أو إستمرت اكتر من 3 أيام لازم تراجع الطبيب.
4. إلتهاب المعدة و الأمعاء:
   الطفل بيجيله قيء وإسهال وآلام في البطن. وفي الغالب دا بيكون بسبب فيروسات منتشرة بتسبب إلتهاب في المعدة. و معظم فيروسات المعدة بتختفي في خلال أيام قليلة لحد أسبوع بالكتير و مابتحتاجش اكتر من الراحة والإهتمام و لازم الطفل يشرب كمية سوايل كفاية علي فترات عشان تمنع الجفاف.
5. مرض اليد والقدم والفم :
   هو عدوى فيروسية مش خطيرة لكنها معدية بدرجة كبيرة وبتنتشر أكتر في الصيف، الأطفال أقل من 5 سنين عرضة للإصابة بيه بيتنقل من طفل لطفل عن طريق اللمس أو الكحة أو العطس أو خروجه مع البراز، وأعراضه بتكون عبارة عن حمى وإلتهاب الحلق بسبب وجود قرح فيه وفقدان الشهية،بيستمر من 7 ل 10 أيام
   و القرح اللي في الفم أو الحلق بيظهر معاها حبوب (بثور) حمرا علي كف الأيدين وبطن القدمين، و لازم مع وجود الفيروس الإهتمام بالطفل وتوفير الراحة و شرب سوايل كتير لتقليل الجفاف.
6. المرض الخامس :
   و اللي معروف بإسم (متلازمة صفع الخد)
   و دا بيبان من خلال طفح احمر علي الخدين و أحيانا حمي خفيفة و سيلان الأنف و دا بيصيب أكتر الأطفال حتي سن 3 سنوات. و يفضل فيه استشاره دكتور اطفال.
7. بكتيريا الحلق:
   نادر لما يصيب الرضع لكنه بيصيب الأطفال. والبكتيريا بتنتشر في الغالب من خلال الكحة والعطس. و أعراضه ألم في الحلق و اللي أحيانا بيكون شديد لدرجة إن بيكون في صعوبة في البلع أو الكلام.
   يستحسن إستشارة دكتور اطفال لمعرفة لو سبب الأعراض دي بكتيريا الدكتور هيكتبله مضاد حيوي مناسب، أو سبب أخر فياخد العلاج اللازم.
8. الإنفلونزا :
   التطعيم السنوي المضاد للإنفلونزا بيشكل وقاية للطفل ضد الإصابة بالإنفلونزا، لكنه بيتاخد بعد إستشارة الطبيب.
   من أعراضها الحمي و ألم في الجسم و صداع وإلتهاب في الحلق وكحة وأحيانًا قيء وإسهال. وبتيجي الإنفلونزا في الغالب في فصل الشتا وبتستمر لأكتر من إسبوع وأحيانًا بتؤدي لمضاعفات منها الإلتهاب الرئوي. وفي حالة الإصابة بفيروس الإنفلونزا الدكتور هيكتبلك مضاد للفيروسات مناسب.
9. إلتهاب الملتحمة :
   ودا بيكون عباره عن إلتهاب في أنسجة الجفون وبيسبب إحمرار وبيشوش الرؤية.أسبابه متعددة ممكن عدوى بكتيرية وساعتها يتعالج بقطرات مضاد حيوي، أو فيروس مش هيحتاج علاج أو حساسية من حاجة معينة في الهواء ساعتها هياخد قطرات حساسية، عشان كده معرفة السبب مهمة لتحديد العلاج المناسب.
   و لازم تاخد بالك إن المرض ده سريع الانتشار و معدي و ممكن ينتشر في أسرتك بسهوله.
   ويستحسن إن الطفل ميروحش المدرسة لحد ما يتم العلاج ونهتم بالنظافة الشخصية من خلال غسل الإيدين وتجنب لمس العينين وإنه ميشاركش الفوط والمخدات مع حد تاني لنتجنب العدوي.
10.  الديدان الدبوسية:
    لازم تاخد بالك لو لقيت طفلك بيهرش كتير في منطقة المؤخرة. ممكن يكون مصاب بالديدان، الديدان الدبوسية بيكون السبب الأساسي فيها عدم الإهتمام بالنظافة الشخصية.
    هرش منطقة المؤخرة للطفل المصاب بيسبب نقل بيض الديدان منه لأطفال تانية، وعن طريق وضع إيدهم في الفم بيدخل البيض للجهاز الهضمي ويفقس ويرقد فيه ويعدوا أطفال تانية بنفس الطريقة. لازم مراجعة الطبيب للعلاج والإهتمام بالنظافة الشخصية بشكل عام.

إمتى ضروري أزور الدكتور؟

في الغالب الأمراض اللي بتصيب الأطفال بتاخد وقتها وبعدين تمر بسلام، لكن في أعراض معينة لو ظهرت فلازم نتطمن على الطفل في الحال، الأعراض دي زي:

• الجفاف: لو تبول الطفل أقل من الطبيعي أو جلده ناشف وعينه غائرة .
• الحمى الشديدة: درجة الحرارة المرتفعة خطر جدًا خصوصًا في الرضع وحديثي الولادة.
• التنفس بصعوبة: الطفل بياخد وقت كبير بين كل نفس والتاني أو بيتنفس بسرعة جدًا.
• عدم الرغبة في الأكل: لو الطفل مش راضي ياكل، وتقريبًا بياكل أقل من نص أكله الطبيعي.
• لو طفلك إتشخص بالسكر أو مرض مناعي أو أي مرض مزمن، إستشير الدكتور لو جاله أي تعب

لو شاكك إن طفلك عنده أي مرض منهم او حابب انك تطمن على صحة طفلك باستمرار ممكن تحجز وتتابع عند دكتور من دكاترة الاطفال من على موقعنا

المراجع:

https://www.webmd.com/children/guide/childhood-illnesses-get-facts
https://www.parents.com/health/the-10-most-common-childhood-illnesses/